जळगाव-लाईव्ह ट्रेंडस न्यूज प्रतिनिधी । मुख्यमंत्री देवेंद्र फडणवीस यांच्या वाढदिवसानिमित्त समाजोपयोगी उपक्रम राबविण्याच्या त्यांच्या आवाहनाला प्रतिसाद देत, जळगावातील डॉ. उल्हास पाटील वैद्यकीय रुग्णालय पुढे आले आहे. ‘सेवा का अभियान’ अंतर्गत, रुग्णालयाने २२ ते २४ जुलै या तीन दिवसांसाठी मोफत शस्त्रक्रिया शिबिराचे आयोजन केले आहे. या अभियानाच्या पहिल्याच दिवशी रुग्णांनी उत्स्फूर्त प्रतिसाद देत ३८ जणांनी शस्त्रक्रियेसाठी नोंदणी केली आहे.
मुख्यमंत्री फडणवीस यांचा वाढदिवस मंगळवारी विविध समाजोपयोगी उपक्रमांनी साजरा करण्यात आला. त्यांच्या आवाहनानुसार, डॉ. उल्हास पाटील वैद्यकीय रुग्णालयातर्फे हे ‘सेवा का अभियान’ राबविण्यात येत आहे. या अभियानांतर्गत शासकीय आरोग्य योजनांमध्ये समाविष्ट नसलेल्या सर्व प्रकारच्या शस्त्रक्रिया, जसे की मोतीबिंदू, सिझेरियन, संतती नियमन आणि जनरल शस्त्रक्रिया मोफत केल्या जात आहेत.
याशिवाय, रुग्णालयात एन्जीओग्राफीसह विविध आजारांवर अल्प दरात शस्त्रक्रिया व उपचार दिले जात आहेत. तसेच, एमआरआय, सीटी स्कॅन, सोनोग्राफीसह पॅथॉलॉजिकल चाचण्या देखील अत्यल्प दरात उपलब्ध करून देण्यात आल्या आहेत. अभियानाच्या पहिल्याच दिवशी १५० हून अधिक रुग्णांची आरोग्य तपासणी करण्यात आली, त्यापैकी ३८ रुग्णांची शस्त्रक्रियेसाठी नोंदणी करण्यात आली आहे.
या नोंदणीकृत रुग्णांवर तज्ज्ञ डॉक्टरांकडून विविध प्रकारच्या शस्त्रक्रिया मोफत व अल्प दरात केल्या जाणार आहेत. यात जनरल सर्जरी, हृदयविकार, कान-नाक-घसा, स्त्रीरोग, नेत्ररोग यांसारख्या महत्त्वाच्या शस्त्रक्रियांचा समावेश आहे. हे अभियान २४ जुलैपर्यंत सुरू राहणार असून, गरजू रुग्णांनी त्वरित नावनोंदणी करून या महत्त्वपूर्ण अभियानाचा लाभ घ्यावा, असे आवाहन डॉ. उल्हास पाटील रुग्णालयातर्फे करण्यात आले आहे.
