नाशिक-लाईव्ह ट्रेंडस न्यूज वृत्तसेवा | नाशिक विभाग शिक्षक मतदारसंघाच्या निवडणुकीसाठी राज्याचे महसूलमंत्री राधाकृष्ण विखे पाटील यांचे बंधू प्रवरा आरोग्य अभिमत विद्यापीठाचे कुलपती डॉ. राजेंद्र विखे पाटील यांनी शक्ती प्रदर्शन करीत सोमवारी अपक्ष म्हणून अर्ज दाखल केला. महायुतीत ही जागा शिवसेना शिंदे गटाकडे आहे. डॉ. विखे हे महायुतीकडून उमेदवारी मिळवण्यासाठी प्रयत्नशील आहेत. विद्यमान सेना पुरस्कृत आमदार किशोर दराडे हे पक्षीय उमेदवारीसाठी इच्छुक नसल्याने भाजपने ही जागा शिवसेनेकडून हिसकावून घेण्याची तयारी केल्याचे दिसत आहे. सेना पुरस्कृत आमदार दराडे यांनी शिवसेनेच्या कुठल्याही गटात प्रवेश करणे टाळले आहे.
महाविकास आघाडीचा उमेदवार निश्चित झाला असला तरी महायुतीत या जागेवरून शिवसेना-भाजपमध्ये रस्सीखेच सुरू आहे. लोकसभा निकालाचा कल पाहून याबाबत निर्णय होईल, असे सांगितले जाते. शिंदे गटाने आमदार दराडे यांना आपल्याकडे खेचण्याचे प्रयत्न केले होते. मात्र त्यास यश आले नाही. दराडे हे देखील लोकसभेचा अंदाज घेऊन निर्णय घेणार आहेत. मागील निवडणुकीत ते अपक्ष म्हणून मैदानात होते. आपण कुठल्याही पक्षात प्रवेश केलेला नसल्याचे ते आजही स्पष्ट करतात. त्यामुळे ते शिंदे गटात जातील की नाही, याबाबत साशंकता आहे. या एकंदर परिस्थितीत भाजपने ही जागा ताब्यात घेण्याचे नियोजन केल्याचे दिसत आहे. सोमवारी महसूलमंत्री राधाकृष्ण विखे यांचे बंधू डॉ. राजेंद्र विखे-पाटील यांनी उमेदवारी अर्ज दाखल केला. महायुतीच्या सर्व नेत्यांना आपण भेटलो. महायुतीचा उमेदवार म्हणून आपणास उमेदवारी द्यावी, अशी मागणी केली असल्याचे डॉ. राजेंद्र विखे यांनी सांगितले.
