पारोळा-लाईव्ह ट्रेंड्स न्यूज प्रतिनिधी । पारोळा शहराचे ग्रामदैवत असलेल्या श्री बालाजी महाराज संस्थानाच्या ब्रह्मोत्सवातील ऐतिहासिक रथोत्सवाच्या पार्श्वभूमीवर जळगावचे जिल्हाधिकारी रोहन घुगे यांनी श्री बालाजी मंदिराला भेट दिली. यावेळी मंदिराच्या भव्य सभामंडपातील राजस्थानच्या गुलाबी संगमरवरी दगडावरील आकर्षक कलाकुसर, सुबक नक्षीकाम आणि दक्षिण भारतीय स्थापत्यशैलीचा अनोखा संगम पाहून ते भारावून गेले. मंदिराचा ऐतिहासिक वारसा, स्थापत्यकलेचे वैशिष्ट्य आणि महाराष्ट्रातील उंच रथांपैकी एक मानल्या जाणाऱ्या पारोळ्यातील भव्य रथाची रचना याबाबत त्यांनी सविस्तर माहिती जाणून घेतली.
श्री बालाजी मंदिराच्या सभामंडपातील दगडी बांधकाम, आखीव-रेखीव नक्षीकाम आणि शिल्पकलेतील बारकावे यांनी जिल्हाधिकारी रोहन घुगे यांचे लक्ष वेधून घेतले. राजस्थानच्या गुलाबी संगमरवरी दगडांचा वापर करून साकारण्यात आलेली आकर्षक रचना आणि दक्षिण भारतीय स्थापत्यशैलीत उभारण्यात आलेले मंदिर धार्मिक वास्तुकलेचा वैशिष्ट्यपूर्ण नमुना असल्याचे या भेटीदरम्यान दिसून आले. मंदिरातील विविध कलाकृतींचे त्यांनी बारकाईने निरीक्षण केले. मंदिर परिसरातील भव्य गरुडस्तंभाबाबतही जिल्हाधिकाऱ्यांनी उत्सुकतेने माहिती घेतली. श्री बालाजी महाराज संस्थानाची स्थापना, मंदिराच्या उभारणीमागील इतिहास, धार्मिक परंपरा आणि संस्थानाचा ऐतिहासिक प्रवास याविषयी त्यांनी जाणून घेतले. मंदिरातील कलाकुसर आणि स्थापत्यशैली जतन करण्याच्या दृष्टीने संस्थानाकडून करण्यात येणाऱ्या कार्याचेही त्यांनी कौतुक केले.
पारोळ्यातील ऐतिहासिक रथोत्सव हे ब्रह्मोत्सवातील प्रमुख आकर्षण मानले जाते. या रथाची भव्यता आणि बांधणीतील वैशिष्ट्ये जाणून घेताना जिल्हाधिकारी घुगे यांनी रथाच्या चाकांची रचना, त्यांचे वजन, रथावरील सुबक नक्षीकाम आणि रथाच्या संचालनासाठी वापरण्यात येणाऱ्या पारंपरिक पद्धतींची माहिती घेतली. एवढ्या मोठ्या रथाची उभारणी आणि त्याचे सुरक्षितपणे संचालन कशा प्रकारे केले जाते, याबाबत त्यांनी विशेष रस दाखविला. रथाच्या हालचालींवर नियंत्रण ठेवण्यासाठी मोगऱ्यांचा वापर कसा केला जातो, रथाला दिशा देण्याची पारंपरिक पद्धत कोणती आणि रथाच्या संचालनात कोणती खबरदारी घेतली जाते, याबाबतही त्यांनी माहिती जाणून घेतली. अनेक वर्षांची परंपरा जपणाऱ्या या रथाच्या बांधणीमागील कौशल्य आणि त्यातील तांत्रिक बारकावे त्यांना विशेष भावले.
यावेळी संस्थानाचे विश्वस्त रावसाहेब भोसले यांनी जिल्हाधिकारी रोहन घुगे यांना मंदिराचा इतिहास, ब्रह्मोत्सवाची परंपरा, रथोत्सवाचे महत्त्व, रथाची बांधणी आणि संस्थानाच्या धार्मिक व सांस्कृतिक कार्याची सविस्तर माहिती दिली. ऐतिहासिक वारसा आणि परंपरा जतन करून त्या पुढील पिढीपर्यंत पोहोचविण्याचे कार्य संस्थानाकडून सुरू असल्याबद्दल जिल्हाधिकाऱ्यांनी समाधान व्यक्त केले. पारोळा शहराच्या धार्मिक, सांस्कृतिक आणि ऐतिहासिक ओळखीमध्ये श्री बालाजी महाराज संस्थानाचे महत्त्वपूर्ण स्थान आहे. ब्रह्मोत्सव आणि रथोत्सवाच्या माध्यमातून ही परंपरा आजही उत्साहाने जपली जात आहे. मंदिराची भव्य स्थापत्यशैली आणि रथोत्सवाची वैशिष्ट्यपूर्ण परंपरा पाहून जिल्हाधिकारी घुगे यांनी कौतुक केले. तसेच पुन्हा वेळ काढून श्री बालाजी महाराजांच्या दर्शनासाठी निश्चित येणार असल्याचे त्यांनी सांगितले.
या भेटीदरम्यान श्री बालाजी महाराज संस्थानाच्या वतीने जिल्हाधिकारी रोहन घुगे यांचा सत्कार करण्यात आला. संस्थानाचे विश्वस्त रावसाहेब भोसले, केशव क्षत्रिय, अभय शिंपी आणि रमेश भगवती यांनी त्यांना शाल, श्रीफळ आणि श्री बालाजी महाराजांची प्रतिमा भेट देऊन सन्मानित केले. याप्रसंगी अमळनेर विभागाचे उपविभागीय पोलीस अधिकारी विनायक कोते, तहसीलदार डॉ. उल्हास देवरे, पारोळा पोलीस निरीक्षक दीपक पाटील, पोलीस उपनिरीक्षक सुनील पवार, संदेश माने, नितीन सोनार यांच्यासह अन्य मान्यवर उपस्थित होते.
