जळगाव- लाईव्ह ट्रेंड्स न्यूज प्रतिनिधी । शहरातील अतिक्रमण निर्मूलन मोहिमेत महानगरपालिका प्रशासनाकडून कथितरित्या भेदभाव केला जात असल्याचा गंभीर आरोप करत महाराष्ट्र नवनिर्माण सेनेने आक्रमक पवित्रा घेतला आहे. खोटे नगर ते कालिका माता मंदिर या मुख्य मार्गावर मोठ्या प्रमाणावर अतिक्रमणे वाढली असतानाही, प्रशासन केवळ निवडक लोकांवर कारवाई करत असल्याचा दावा मनसेने केला आहे. या संदर्भात मनसेच्या शिष्टमंडळाने गुरुवार, ९ एप्रिल रोजी महानगरपालिका आयुक्तांची भेट घेऊन त्यांना सविस्तर निवेदन सादर केले आणि प्रशासकीय भूमिकेवर तीव्र शब्दांत ताशेरे ओढले.
शहरातील खोटे नगर ते कालिका माता मंदिर या वर्दळीच्या रस्त्यावर परप्रांतीय व्यापाऱ्यांनी मोठ्या प्रमाणावर आपली दुकाने आणि साहित्य थाटले आहे. रस्ता अडवून व्यवसाय सुरू असतानाही अतिक्रमण विभागाकडून याकडे सोयीस्कर दुर्लक्ष केले जात असल्याचे मनसेचे म्हणणे आहे. याउलट, पोटाची खळगी भरण्यासाठी छोटे-मोठे व्यवसाय करणाऱ्या स्थानिक मराठी तरुणांवर मात्र प्रशासन अत्यंत कठोरपणे कारवाई करत आहे. “अतिक्रमण विभागाचे नियम केवळ मराठी तरुणांसाठीच आहेत का?” असा सवाल उपस्थित करत मनसेने प्रशासनाला धारेवर धरले असून शहरातील या दुहेरी निकषांमुळे सर्वसामान्यांमध्ये असंतोष पसरला असल्याचे आयुक्तांच्या निदर्शनास आणून दिले.
या समस्येवर कायमस्वरूपी तोडगा काढण्यासाठी शहरात हॉकर्स धोरणाची प्रभावी अंमलबजावणी करावी, अशी मागणी मनसेने रेटून धरली आहे. नियोजित आणि कायदेशीर हॉकर्स झोन तातडीने निश्चित करून, त्या ठिकाणी लघु व्यावसायिकांना मूलभूत सुविधा आणि कायदेशीर संरक्षण उपलब्ध करून द्यावे, असे निवेदनात नमूद करण्यात आले आहे. विशेषतः स्थानिक मराठी तरुणांना सन्मानाने व्यापार करता यावा, यासाठी त्यांच्यासाठी स्वतंत्र आणि सुसज्ज हॉकर्स झोन तयार करण्याची मागणी करण्यात आली आहे. जोपर्यंत सर्व व्यावसायिकांना समान न्याय मिळत नाही, तोपर्यंत मनसे या प्रश्नावर माघार घेणार नाही, अशी भूमिका पदाधिकाऱ्यांनी मांडली.
प्रशासनाने या निवेदनाची दखल घेऊन परप्रांतीय व्यापाऱ्यांकडून होणारे बेकायदेशीर अतिक्रमण तातडीने हटवावे आणि सर्व अतिक्रमणांचे समान निकषांवर पुनरावलोकन करावे, अशी तंबी मनसेने दिली आहे. जर महानगरपालिका प्रशासनाने आपल्या भूमिकेत बदल केला नाही आणि हॉकर्स झोनचा प्रश्न प्रलंबित ठेवला, तर येणाऱ्या काळात महाराष्ट्र नवनिर्माण सेनेच्या वतीने तीव्र आंदोलन छेडले जाईल. इतकेच नव्हे तर, गरज पडल्यास जनतेच्या सहकार्याने मनसे स्टाईलने अतिक्रमण हटवण्याची मोहीम स्वतः हाती घेऊ, असा स्पष्ट इशाराही यावेळी देण्यात आला आहे.
याप्रसंगी मनसे जिल्हाध्यक्ष ॲड. जमील देशपांडे, महानगराध्यक्ष विनोद शिंदे, उपमहानगराध्यक्ष श्रीकृष्ण मेंगडे, ललित शर्मा, चेतन पवार, प्रकाश जोशी, आशुतोष जाधव यांच्यासह महिला सेनेच्या अनिता कापुरे आणि मोठ्या संख्येने कार्यकर्ते व अन्यायग्रस्त मराठी हॉकर्स उपस्थित होते.
जळगाव शहरातील अतिक्रमण कारवाईतील भेदभाव आणि स्थानिक मराठी हॉकर्सवर होणाऱ्या अन्यायाविरोधात मनसेने महानगरपालिका प्रशासनाला जाब विचारला असून, तातडीने हॉकर्स झोन निश्चित करण्याची मागणी करत आंदोलनाचा इशारा दिला आहे.
