जळगाव–लाईव्ह ट्रेंड्स न्यूज प्रतिनिधी । जळगाव शहरातील सिंधी कॉलनी शेजारील नाथ वाडा परिसरात आज श्री कालभैरव महोत्सवाचे भक्तीमय वातावरणात आयोजन करण्यात आले आहे. शंभर वर्षांहून अधिक इतिहास असलेल्या या मंदिरात सकाळपासूनच भाविकांची गर्दी उसळली असून, महाराष्ट्र, गुजरात आणि मध्य प्रदेशातून आलेले शेकडो भाविक दर्शनासाठी येथे उपस्थित आहेत.
नाथ संप्रदायाशी संबंधित असलेले हे कालभैरव मंदिर स्थानिकांच्या श्रद्धेचे केंद्र मानले जाते. मंदिराचा जिर्णोद्धार सन १९९९ साली करण्यात आला असून त्यानंतर प्रत्येक वर्षी येथे महोत्सव मोठ्या उत्साहात साजरा केला जातो. भाविकांमध्ये अशी श्रद्धा आहे की, या मंदिरात नवस केल्यास शरीरातील अनेक व्याधी दूर होतात आणि मनःशांती लाभते. त्यामुळे दरवर्षी या महोत्सवाला मोठ्या संख्येने भाविक उपस्थित राहतात.
आज दिवसभर या ठिकाणी विविध धार्मिक कार्यक्रमांचे आयोजन करण्यात आले आहे. सकाळी होम-हवन आणि कान टोचण्याचा पारंपरिक कार्यक्रम पार पडला. त्यानंतर महाप्रसाद भंडाऱ्याचे आयोजन करण्यात आले असून, संध्याकाळी महाआरती आणि श्री कालभैरव महाराजांची पालखी मिरवणूक निघणार आहे. या मिरवणुकीत नाथ संप्रदायातील साधू-संत, स्थानिक भक्तगण तसेच स्त्री-पुरुष, बालक आणि वृद्ध यांचा उत्साहाने सहभाग असणार आहे.
कालभैरव महोत्सवाच्या निमित्ताने मंदिर परिसर सजविण्यात आला असून, दीपमाळा आणि फुलांच्या तोरणांनी मंदिर उजळून निघाले आहे. भाविकांच्या सोयीसाठी स्वयंसेवकांची टीम कार्यरत असून, दर्शनाची सुव्यवस्था राखण्यासाठी पोलिस बंदोबस्तही ठेवण्यात आला आहे. या उत्सवामुळे नाथ वाडा परिसरात एक भक्तिमय आणि आध्यात्मिक वातावरण निर्माण झाले आहे.
मंदिराचे मुख्य पुजारी रुपचंद नाथ यांनी सांगितले की, “या मंदिराचे वैशिष्ट्य म्हणजे येथे येणाऱ्या प्रत्येक भाविकाची मनोकामना पूर्ण होते, अशी आमची श्रद्धा आहे. गेल्या अनेक दशकांपासून हा महोत्सव लोकभावनेतून साजरा होत आहे आणि प्रत्येक वर्षी भक्तांची संख्या वाढत आहे.” कार्यकर्त्यांनीही कार्यक्रमाचे आयोजन अत्यंत नियोजनबद्ध पद्धतीने केल्याचे त्यांनी नमूद केले.
