पुणे-लाईव्ह ट्रेंडस न्यूज वृत्तसेवा | पुण्यातील कसबा पेठचे माजी आमदार रविंद्र धंगेकर यांनी काँग्रेसला सोडचिठ्ठी दिल्यानंतर, काँग्रेसला आणखी एक मोठा धक्का बसण्याची शक्यता निर्माण झाली आहे. काँग्रेसमधील ज्येष्ठ नेते भाऊराव पाटील गोरेगावकर हेही मुख्यमंत्री एकनाथ शिंदे यांच्या नेतृत्वाखाली शिवसेनेत प्रवेश करण्याच्या तयारीत असल्याची माहिती समोर आली आहे. ते हजारो कार्यकर्त्यांसह शिंदे गटात जाणार असल्याचे सांगितले जात आहे. या घडामोडींमुळे काँग्रेससाठी मोठे आव्हान उभे राहिले आहे.
आगामी स्थानिक स्वराज्य संस्था निवडणुकीच्या पार्श्वभूमीवर महायुती आणि महाआघाडीमध्ये राजकीय कुरघोड्या सुरू असून, काँग्रेसमधून होत असलेली गळती पक्षासाठी चिंतेचा विषय ठरत आहे. महायुतीकडून काँग्रेस आणि इतर पक्षातील नाराज नेत्यांना आपल्या गटात सामील करून घेण्याची रणनीती दिसत आहे, तर काँग्रेससमोर पक्षातील नेतृत्व टिकवण्याचे आव्हान निर्माण झाले आहे.
२०२४ च्या विधानसभा निवडणुकीत काँग्रेसकडून तिकीट न मिळाल्याने बंडखोरी करणारे भाऊराव पाटील गोरेगावकर अखेर काँग्रेसला सोडचिठ्ठी देण्याच्या तयारीत आहेत. विधानसभा निवडणुकीत अपक्ष उमेदवार म्हणून निवडणूक लढवत त्यांनी लक्षावधी मते मिळवली होती, मात्र पराभवानंतर त्यांनी भविष्यातील राजकीय वाटचालीसाठी शिंदे गटात जाण्याचा निर्णय घेतला आहे. आगामी निवडणुकांसाठी तयारी करत ते हजारो समर्थकांसह मुख्यमंत्री एकनाथ शिंदे यांच्या नेतृत्वाखाली शिवसेनेत प्रवेश करणार असल्याची माहिती मिळाली आहे.
रविंद्र धंगेकर यांच्या काँग्रेसला दिलेल्या सोडचिठ्ठीनंतर आता भाऊराव पाटील गोरेगावकर यांच्या पक्षत्यागामुळे काँग्रेससाठी आणखी अडचण निर्माण होणार आहे. यामुळे काँग्रेसमधून आणखी नेते बाहेर पडणार का? आणि याचा आगामी निवडणुकीत किती मोठा परिणाम होणार? याकडे सर्वांचे लक्ष लागले आहे.
पुण्यातील कसबा विधानसभा मतदारसंघाचे आमदार रविंद्र धंगेकर यांनीही काँग्रेसला रामराम करण्याचा निर्णय घेतला आहे. गेल्या काही दिवसांपासून पक्षातील नाराजीच्या चर्चा सुरू होत्या, अखेर त्यांनी माध्यमांसमोर येत काँग्रेसमधून बाहेर पडत असल्याची घोषणा केली. तसेच आज सायंकाळी मुख्यमंत्री एकनाथ शिंदे यांची भेट घेऊन आपला अधिकृत निर्णय जाहीर करणार असल्याचे त्यांनी स्पष्ट केले.
महायुती आगामी निवडणुकांसाठी काँग्रेस व इतर पक्षातील बंडखोर नेत्यांना आपल्या गटात सामील करून मजबूत होत आहे. त्यामुळे काँग्रेसमधील गळती थांबणार की पक्षाला आणखी काही मोठे झटके बसणार, हे पाहणे महत्त्वाचे ठरणार आहे. राज्याच्या राजकारणात मोठे उलथापालथ होण्याची शक्यता असून, काँग्रेसने आता गळती रोखण्यासाठी कोणती रणनीती आखणार, हे पाहणे उत्सुकतेचे ठरेल.
