जळगाव–लाईव्ह ट्रेंड्स न्यूज प्रतिनिधी । राज्य निवडणूक आयोगाने २९ महानगरपालिकांच्या सार्वत्रिक निवडणुकांसाठी जारी केलेल्या मतदार यादी कार्यक्रमात महत्त्वाचे बदल केले आहेत. आयोगाने २६ नोव्हेंबर रोजी पाठवलेल्या पत्रानुसार प्रारूप मतदार यादीवरील हरकतींचा निपटारा आणि त्यानंतरची अंतिम यादी प्रसिद्ध करण्याच्या तारखेत सुधारणा करत नवीन वेळापत्रक जाहीर केले आहे. निवडणूक प्रक्रियेत पारदर्शकता आणि मतदारांना योग्य वेळेत माहिती मिळावी या उद्देशाने हा निर्णय घेतल्याचे आयोगाने स्पष्ट केले आहे.
सुधारित कार्यक्रमानुसार, प्रारूप मतदार यादीवर दाखल झालेल्या हरकतींचा निर्णय घेऊन प्रभागनिहाय अंतिम मतदार यादी प्रमाणित करून प्रसिद्ध करण्याची तारीख पूर्वी १० डिसेंबर २०२५ होती. ही तारीख आता वाढवून १५ डिसेंबर २०२५ करण्यात आली आहे. या बदलामुळे मतदार नोंदणी आणि हरकतींची पडताळणी अधिक काटेकोरपणे करण्यास मदत होणार असल्याचे अधिकृत सूत्रांनी सांगितले.
मतदान केंद्रांच्या ठिकाणी मतदार यादी प्रसिद्ध करण्याची तारीखही बदलण्यात आली आहे. आधी ही यादी १५ डिसेंबरला प्रसिद्ध होणार होती; मात्र तिची सुधारित तारीख आता २० डिसेंबर २०२५ अशी निश्चित झाली आहे. यामुळे नागरिकांना त्यांच्या नावाची नोंद योग्य मतदान केंद्रावर तपासण्यास अधिक वेळ मिळणार आहे.
याशिवाय मतदान केंद्रनिहाय अंतिम मतदार यादी प्रसिद्ध करण्याची तारीखही पुढे ढकलण्यात आली आहे. पूर्वी ही तारीख २२ डिसेंबर २०२५ होती; आता आयोगाने सुधारणा करून ती २७ डिसेंबर २०२५ निश्चित केली आहे. निवडणूक आयोगाचे सचिव सुरेश काकाणी यांनी सुधारित वेळापत्रकासंदर्भातील अधिकृत पत्र जारी करून सर्व संबंधित महानगरपालिका आणि विभागांना सूचना दिल्या आहेत.
