जळगाव–लाईव्ह ट्रेंड्स न्यूज प्रतिनिधी । महाराष्ट्र लोकसेवा आयोगाच्या (एमपीएससी) सूचनेनुसार जळगाव शहरातील दोन महत्त्वाच्या स्पर्धा परीक्षांच्या दिनांकात बदल करण्यात आला आहे. आयोगाने जारी केलेल्या शुद्धीपत्रकानंतर हजारो उमेदवारांचे लक्ष नवीन वेळापत्रकाकडे वळले असून, परीक्षेची तयारीही त्यानुसार बदलण्याची गरज निर्माण झाली आहे.
गट ब (अराजपत्रित) सेवा संयुक्त पूर्व परीक्षा २०२५ ही परीक्षा यापूर्वी २१ डिसेंबर २०२५ रोजी २३ केंद्रांवर घेण्यात येणार होती. तसेच गट क सेवा संयुक्त पूर्व परीक्षा २०२५ ही ४ जानेवारी २०२६ रोजी १४ केंद्रांवर होणार होती. मात्र आयोगाने ८ डिसेंबर २०२५ रोजी काढलेल्या शुद्धीपत्रकानुसार या दोन्ही परीक्षांचे वेळापत्रक बदलण्यात आले आहे.
नवीन नियोजनानुसार महाराष्ट्र गट ब (अराजपत्रित) सेवा संयुक्त पूर्व परीक्षा आता ४ जानेवारी २०२६ रोजी होणार आहे. तर महाराष्ट्र गट क सेवा संयुक्त पूर्व परीक्षा ११ जानेवारी २०२६ रोजी घेण्यात येणार आहे. परीक्षेच्या वेळापत्रकातील हा बदल राज्यभरातील उमेदवारांसाठी अत्यंत महत्त्वाचा मानला जात असून, परीक्षेची रणनीती पुन्हा आखण्याची आवश्यकता निर्माण झाली आहे.
या बदलासंदर्भात निवासी उपजिल्हाधिकारी वैशाली चव्हाण यांनी माहिती देताना सांगितले की, उमेदवारांनी सुधारित वेळापत्रकाचा स्वीकार करून अभ्यासाचे नियोजन नव्याने करावे. आयोगाच्या अधिकृत सूचनांनुसारच तयारी करणे हितावह ठरेल, असे आवाहन त्यांनी प्रसिद्धीपत्रकाद्वारे केले आहे.
