जळगाव-लाईव्ह ट्रेंडस न्यूज प्रतिनिधी । जळगाव येथील नगर भूमापन कार्यालयात एक हजारांची लाच घेणाऱ्या खाजगी पंटरला रंगेहाथ पकडण्यात आले आहे. लाचलुचपत प्रतिबंधक विभागाच्या पथकाने ही कारवाई केली, ज्यामुळे कार्यालयातील भ्रष्टाचाराचा आणखी एक नमुना समोर आला आहे. याबाबत जिल्हापेठ पोलीस ठाण्यात गुन्हा दाखल करण्यात आला आहे.
जळगाव शहरातील रहिवासी असलेले तक्रारदार यांच्या आजोबांच्या नावे असलेल्या प्लॉटवर वारस नोंदणी, हक्कसोड प्रक्रिया आणि कर्जाच्या नोंदीसाठी संबंधित नगर भू मापन अधिकारी कार्यालयातील साहेबांकडून काम करून देण्याच्या मोबदल्यात आरोपी अविनाश सदाशिव सनंसे (वय ४९), रा. नगर भू मापन अधिकारी कार्यालय, जळगाव) यांनी लाचेची मागणी केली होती.
सुरुवातीला प्रत्येक नोंदणीसाठी ५ हजार रुपये प्रमाणे एकूण १५ हजार रुपये आणि काम सुरू करण्यासाठी १,५०० रुपये मागण्यात आले. तडजोडीनंतर एक हजार रुपयांची रक्कम ठरली. तक्रारदाराने याबाबत तक्रार केल्यानंतर लाचलुचपत प्रतिबंधक विभागाने मंगळवारी १८ फेब्रुवारी रोजी दुपारी ४ वाजता सापळा रचला. ठरल्याप्रमाणे तक्रारदाराने आरोपीला १ हजार रुपये देताच पथकाने त्याला रंगेहात पकडले. या प्रकरणी जळगाव जिल्हा पेठ पोलीस ठाण्यात गुन्हा दाखल करण्यात आला आहे.
