धरणगाव लाईव्ह ट्रेंड्स न्यूज प्रतिनिधी | मोबाईलवर व्हिडिओ (रील) बनवण्याचा मोह दोन शाळकरी मित्रांसाठी किती जीवघेणा ठरू शकतो, याची प्रचिती देणारी अत्यंत दुर्दैवी घटना धरणगाव तालुक्यातील पाळधी चांदसर रेल्वे गेटजवळ घडली आहे. रविवारी २५ ऑक्टोबर रोजी सकाळी ११ वाजेच्या सुमारास धावत्या रेल्वेसमोर धोकादायक पद्धतीने रील शूट करत असताना, अहमदाबाद हावडा एक्स्प्रेसने धडक दिल्याने या दोन तरुण मित्रांचा जागीच मृत्यू झाला.
या भीषण अपघातात मयत झालेल्या तरुणांची नावे प्रशांत पवन खैरनार (वय १८ वर्षे) आणि हर्षवर्धन महेंद्र नन्नवरे (वय १८ वर्षे) अशी आहेत. दोघेही पाळधी येथील महात्मा फुले नगर, प्लॉट भाग (रेल्वे गेट जवळील प्लॉट) येथील रहिवासी होते. परिसरात अत्यंत मनमिळाऊ म्हणून त्यांची ओळख होती.
मिळालेल्या माहितीनुसार, रविवारची सुट्टी असल्याने हे दोन्ही मित्र पाळधी चांदसर रेल्वे गेटजवळ असलेल्या रेल्वे ट्रॅकवर आले होते. मोबाईलवरील लोकप्रिय ॲपसाठी अधिक आकर्षक आणि धोकादायक ठरेल असा व्हिडिओ (रील) तयार करण्याचा त्यांचा प्रयत्न होता. यावेळी धरणगावकडून जळगावकडे जाणाऱ्या अहमदाबाद-हावडा एक्स्प्रेस गाडीची त्यांना धडक बसली. रेल्वेच्या वेगामुळे हा अपघात इतका भीषण होता की दोन्ही तरुणांना बचाव करण्याची संधी मिळाली नाही आणि त्यांचा जागीच मृत्यू झाला. त्यांच्या निष्काळजीपणामुळे आणि साहसी कृत्यामुळे दोन कुटुंबीयांवर मोठा आघात झाला आहे.
या घटनेची माहिती मिळताच पाळधी पोलीस तातडीने घटनास्थळी दाखल झाले आणि त्यांनी पंचनामा करण्याची प्रक्रिया सुरू केली. या दुःखद घटनेमुळे पाळधी परिसरात मोठी हळहळ व्यक्त होत असून, प्रसिद्धीच्या हव्यासापोटी तरुणांमध्ये वाढलेल्या धोकादायक ‘रील’ बनवण्याच्या प्रवृत्तीवर समाजाने गांभीर्याने विचार करण्याची वेळ आली आहे.
