जळगाव-लाईव्ह ट्रेंडस न्यूज प्रतिनिधी । जळगाव महानगरपालिकेच्या जन्म-मृत्यू नोंदणी विभागात मोठा गैरव्यवहार उघडकीस आला आहे. तब्बल 43 जणांनी तहसीलदारांच्या बनावट सही आणि शिक्क्याचा वापर करून जन्म आणि मृत्यूचे दाखले मिळवल्याचे समोर आले आहे. या धक्कादायक प्रकारात 11 अशा व्यक्तींचा समावेश आहे, ज्यांचा मृत्यू झालेला आहे. याप्रकरणी नायब तहसीलदार नवीनचंद अशोक भावसार यांनी शहर पोलीस स्टेशनमध्ये 43 जणांविरुद्ध फिर्याद दाखल केली आहे, ज्यामुळे खळबळ उडाली आहे.
महानगरपालिकेच्या जन्म मृत्यू नोंदणी विभागाने एकूण 50 दाखले जारी केले होते. काही दिवसांपूर्वी या दाखल्यांच्या सत्यतेबाबत शंका आल्यानंतर तहसीलदारांनी चौकशीचे आदेश दिले. या चौकशीत धक्कादायक माहिती समोर आली. 50 पैकी केवळ सात अर्जच वैध ठरले, तर उर्वरित 43 दाखले अवैध आणि बनावट असल्याचे निष्पन्न झाले.
या घोटाळ्याची गंभीरता यावरून लक्षात येते की, बनावट ठरलेल्या 43 अर्जांपैकी 11 जणांचे जन्म किंवा मृत्यू अर्ज तहसील कार्यालयाच्या आवक रजिस्टरमध्ये नोंदलेलेच नाहीत. याचा अर्थ त्यांचे अर्ज कार्यालयात सादर न करताच बनावट दाखले तयार करण्यात आले. या गैरव्यवहारात जळगाव शहर आणि नशिराबादमधील नागरिकांचा अधिक समावेश आहे, तर यावल आणि मुंबईतील प्रत्येकी एका व्यक्तीचाही समावेश आहे.
नायब तहसीलदार नवीनचंद भावसार यांनी दाखल केलेल्या फिर्यादीत या गैरकृत्यात सहभागी असलेल्या 43 जणांची नावे नमूद आहेत. त्यानुसार, जळगाव शहरातील चांद महंमद प्यारजी बागवान, असलम खान सादिक खान, अशफाक बुढान बागवान, बुशरा खान मोहम्मद इस्लाउद, मोहसिन चांद मोहम्मद, निगार सुलताना हाफिज खान, समीर खान अयुब खान, नसरीन बानो आयुब खान, अफजल खान आयुब खान, नदीम खान हाफिज खान, शिरीष बानो फरीक शहा, आरिफ खान इसा खान, शहाआरिफ अहमद, समशेर बेग तुराब बेग, तोसिफ शहा जिनाउल्ला शहा, तुराब बेग गुलाब बेग, शहनाजबी शेख मुनीर, वाहेदाबी अब्दुल गणी, शोहरत अली शरीफ मुनसारी, शेख शांनदोस शेख इसाक यांचा समावेश आहे.
याव्यतिरिक्त, नशिराबाद येथील कनिज रज्जाबी अब्दुल गणी, मुंबई येथील अब्दुल्ला अजगर अली सय्यद, यावल येथील खान असदुल्ला खान हाफिज आणि जळगाव शहरातील नुसरत बानो, जबी उल्ला शहा, शहा अयाज अहमद अब्दुल अजीज, मोहम्मद वसीम जबी मुल्ला शहा, मोहम्मद जफर जबी उल्ला शहा, जनीक परविन अमानुउल्ला शहा, बिस्मिल्लाह खान, शेख सलीम शेख बशीर, शेख अनिल शेख बशीर, मोहम्मद अखिल शेख बशीर, मोहम्मद कलीम शेख बशीर, शरीफ नईमोद्दीन, मोहम्मद शकील शेख बशीर, अमरीन रशीद पटेल, जाकीर फकीर मोहम्मद तांबोळी, तबसून परविन मोहम्मद इकबाल, शेख मोहम्मद इकबाल अब्दुल रहीम, राहत नाच जबी उल्ला शहा, अंजूमबी शेख फरीद, तसलीमा बी शेख यासिम यांचा समावेश आहे.
फिर्यादीत असेही नमूद आहे की, यातीलच 11 जन्म-मृत्यू अर्जांची नावे तहसील कार्यालयाच्या आवक रजिस्टरमध्ये नोंदलेली आहेत. मात्र, त्यांनी सादर केलेल्या जन्म मृत्यू नोंदणी आदेशावरील तहसीलदारांची सही बनावट असल्याचे आढळून आले आहे.
