Breaking : बंदुकीचा धाक दाखवून पेट्रोलपंपावर लुट !

अमळनेर-लाईव्ह ट्रेंडस न्यूज प्रतिनिधी । अमळनेर शहरातील एका पेट्रोलपंपावर अज्ञात दरोडेखोरांनी बंदुकीचा धाक दाखवून पेट्रोलपंपावरून सुमारे ३६ हजार ५०० रूपयांची लुट केल्याची खळबळजनक घटनासमोर आली आहे. हा थारारक प्रकार एका सीसीटीव्हीत कैद झाला असून याप्रकरणी अमळनेर पोलीस ठाण्यात गुन्हा दाखल करण्यात आला आहे.

याबाबत अधिक माहिती अशी की, अमळनेर-धुळे रस्त्यावरील डांगर शिवारात असणाऱ्या पांडुरंग पेट्रोल पंपावर गुरूवारी २३ मार्च रोजी मध्यरात्री सव्वा बारा वाजण्याच्या सुमरास अज्ञात व्यक्ती हातात बंदूक घेवून आला. पेट्रोलपंपावर असलेल्या कर्मचाऱ्याला बंदुकीचा धाक दाखवून सुमारे ३६ हजार ५०० रुपये लुटून नेले. यावेळी पेट्रोल पंपावर किशोर रविंद्र पाटील आणि नरेंद्र सोनसिंग पवार हे कार्यरत होते. यावेळी चेहरा पूर्णपणे काळ्या रंगाच्या रुमालाने बांधलेला एक अनोळखी पुरुष आला आणि त्याने कार्यरत कर्मचाऱ्यांना झोपेतून उठवले. त्याच्याजवळ असलेल्या बंदुकीचा दाखवून त्यांच्याकडे असलेले पेट्रोल-डिझेल विक्रीचे पैसे हिसकावून घेतले. तसेच पेट्रोल पंपावर एक कार चालक पेट्रोल भरण्यासाठी आला असता त्याला देखील बंदुकीचा धाक दाखवून त्याच्याकडील पैसे देखील काढून घेतले. हा प्रकार पेट्रोलपंचाच्या सीसीटीव्ही कॅमेऱ्यात कैद झाला आहे. शुक्रवारी २४ मार्च रोजी पोलीस अधिक्षक एम राजकुमार, अपर पोलीस अधिक्षक रमेश चोपडे, विभागीय पोलीस अधिकारी राकेश जाधव, अमळनेर पोलीस ठाण्याचे पोलीस निरीक्षक विजय शिंदे यांच्यासह पथकाने धाव घेवून चौकशी केली. याप्रकरणी अमळनेर पोलीस ठाण्यात गुन्हा दाखल करण्यात आला आहे. पोलीसांनी घटनेचे सीसीटीव्ही फुटेज जारी करण्यात आले असून पुढील चौकशीला सुरूवात करण्यात आली आहे. पुढील तपास पोलीस उपनिरीक्षक विकास शिरोळे करीत आहे.

Protected Content