दिल्ली-लाईव्ह ट्रेंडस न्यूज वृत्तसेवा | केंद्रीय लोकसेवा आयोगाने वादग्रस्त ट्रेनी आयएएस पूजा खेडकर यांच्यावर कारवाई केली असून त्यांचे आयएएस पद तात्पुरते रद्द केले. याशिवाय, खेडकर यांना भविष्यातील कोणत्याही परीक्षेला बसण्यास बंदी घालण्यात आली आहे. खेडकर यांच्या सर्व कागदपत्रांची तपासणी केली असता त्या सीएसई २०२२ च्या नियमांतर्गत दोषी आढळल्या आहेत.
यापूर्वी १८ जुलै रोजी पूजा खेडकर यांची ओळख खोटी ठरवून परीक्षा नियमावलीत नमूद केलेल्या मर्यादेपेक्षा जास्त प्रयत्न केल्याप्रकरणी यूपीएससीकडून पूजा खेडकर यांना कारणे दाखवा नोटीस बजावण्यात आली होती. त्यांना २५ जुलैपर्यंत एससीएनकडे उत्तर सादर करायचे होते. मात्र, उत्तरासाठी आवश्यक कागदपत्रे गोळा करता यावीत, यासाठी त्यांनी ४ ऑगस्टपर्यंतची मुदत मागितली होती.
यूपीएससीने म्हटले आहे की त्यांनी उपलब्ध रेकॉर्डची काळजीपूर्वक तपासणी केली आणि सीएसई २०२२ नियमांच्या तरतुदींचे उल्लंघन केल्याबद्दल त्या दोषी आढळल्या. सीएसई-२०२२ साठी त्यांची तात्पुरती उमेदवारी रद्द करण्यात आली आहे आणि तिला यूपीएससीच्या भविष्यात कोणतीही परीक्षा देता येणार नसल्याचे स्पष्ट केले.
