मुक्ताईनगर-लाईव्ह ट्रेंडस न्यूज प्रतिनिधी | डॉन दाऊद इब्राहिम आणि त्याचा हस्तक छोटा शकील यांच्या नावाने आमदार एकनाथराव खडसे यांना धमक्या आल्याने खळबळ उडाली असून या प्रकरणी मुक्ताईनगर पोलीस स्थानकात गुन्हा दाखल करण्यात आला आहे.
आमदार एकनाथराव खडसे यांना चार वेगवेगळ्या फोन क्रमांकांवरून धमकी आली असून या प्रकरणी अज्ञात आरोपींच्या विरोधात मुक्ताईनगर पोलीस स्थानकात गुन्हा दाखल करण्यात आला आहे. यातील पहिल्यांदा फोन करणार्‍याने दाऊद इब्राहिम आणि छोटा शकील हे एकनाथ खडसे यांना मारणार असल्याचे धमकावले. यानंतर, त्यांना अजून अन्य तीन म्हणजे एकूण चार फोनवरून धमक्या आल्या.
यात समोरच्या व्यक्तीने हमने —इनको मार डाला है, अब तुम छोटा शकील को मार डालो नही तो तुम्हारी खैर नही ! असे धमकावले. सर्व धमक्यांचे फोन हे १३५३५९५२४४; ८१९२०२५८४०; ९३७२७४७६६० आणि ९७६५०७८४४४ या क्रमांकावरून आले असून आ. एकनाथराव खडसे यांनी या प्रकरणी मुक्ताईनगर पोलीस स्थानकात फिर्याद दाखल केली. यात हे धमकीचे फोन १५ आणि १६ एप्रिल रोजी आल्याचे नमूद करण्यात आले आहे. यावरून मुक्ताईनगर पोलीस स्थानकात भादंवि कलम ५०७ अंतर्गत गुन्हा नोंदविण्यात आला आहे. पुढील तपास पोलीस निरिक्षक नागेश मोहिते यांच्या मार्गदर्शनाखाली सहायक पोलीस निरिक्षक संदीप दुनगहू व हवालदार संजय पवार हे करत आहेत.
