मुंबई-लाईव्ह ट्रेंडस न्यूज वृत्तसेवा | महाराष्ट्राच्या राजकारणात सतत घडामोडी सुरू असताना शिवसेनेच्या दोन गटांमध्ये पुन्हा एक मोठी हलचल झाली आहे. शिवसेना पक्षफुटीनंतर मुख्यमंत्री एकनाथ शिंदे यांच्या नेतृत्वाखालील गटाने सत्ता राखली असली, तरी त्यांच्या राष्ट्रीय कर्मचारी सेनेतून तब्बल 250 कर्मचाऱ्यांनी बाहेर पडण्याचा निर्णय घेतला आहे. या कर्मचाऱ्यांनी पुन्हा उद्धव ठाकरे यांच्या भारतीय कामगार सेनेत प्रवेश केला आहे.
सुमारे सहा महिन्यांपूर्वी या 250 कर्मचाऱ्यांनी उद्धव ठाकरेंच्या भारतीय कामगार सेनेचा त्याग करून शिंदे गटाच्या राष्ट्रीय कर्मचारी सेनेत प्रवेश केला होता. हा पक्षप्रवेश मुंबईतील पंचतारांकित कोर्टयार्ड मेरीट हॉटेलमध्ये मोठ्या धडाक्यात पार पडला होता. मात्र, प्रवेशानंतर कर्मचाऱ्यांच्या समस्या आणि तक्रारींकडे दुर्लक्ष केल्याचा आरोप करण्यात येत होता. त्यामुळे अनेक कर्मचाऱ्यांवर अन्याय होत असल्याची भावना निर्माण झाली. अखेर त्यांनी पुन्हा उद्धव ठाकरेंच्या नेतृत्वाखाली काम करण्याचा निर्णय घेतला.
या ‘घरवापसी’ सोहळ्यासाठी भारतीय कामगार सेनेत विशेष कार्यक्रम आयोजित करण्यात आला होता. या कार्यक्रमाला शिवसेना (ठाकरे गट) पक्षप्रमुख उद्धव ठाकरे, खासदार विनायक राऊत, शैलेश परब आणि युनिट प्रमुख रुपेश कदम यांच्यासह ठाकरे गटातील अनेक नेते उपस्थित होते.
महायुतीचे मंत्री आणि शिंदे गटाचे नेते उदय सामंत यांनी काही दिवसांपूर्वी ‘ऑपरेशन टायगर’ सुरू असल्याचे सांगितले होते. त्यांच्या दाव्यानुसार, लवकरच अनेक माजी आमदार आणि खासदार शिवसेना शिंदे गटात प्रवेश करणार आहेत. त्याचा पहिला फटका कोकणातील शिवसेनेला बसल्याचे दिसून आले. ठाकरेंचे निष्ठावंत समर्थक म्हणून ओळखले जाणारे राजन साळवी यांनी शिंदे गटात प्रवेश केला, तर आमदार भास्कर जाधव नाराज असल्याच्या चर्चा सुरू आहेत. त्यामुळे कोकणातील ठाकरेंच्या शिवसेनेला मोठा धोका निर्माण झाल्याचे बोलले जात आहे.
शिंदे गटात मोठ्या प्रमाणावर नेते सामील होत असताना, दुसरीकडे त्यांच्या राष्ट्रीय कर्मचारी सेनेतील 250 कर्मचाऱ्यांनी बाहेर पडण्याचा निर्णय घेतला आहे. हा ठाकरेंच्या गटासाठी मोठा दिलासा आणि शिंदे गटासाठी धक्का मानला जात आहे. आगामी काळात शिवसेनेच्या दोन्ही गटांमधील राजकीय लढत अधिक तीव्र होण्याची शक्यता आहे.
