पारोळा-लाईव्ह ट्रेंडस न्यूज प्रतिनिधी । पारोळा शहरात सोमवार, २२ सप्टेंबर रोजी आश्विन शुद्ध प्रतिपदेच्या शुभमुहूर्तावर श्री बालाजी वाहनोत्सवाला उत्साहात सुरुवात होणार आहे. या सोहळ्यासाठी शहरात भक्तिमय वातावरण निर्माण झाले असून, विविध धार्मिक कार्यक्रमांचे आयोजन करण्यात आले आहे.
या वर्षीचा वाहनोत्सव अत्यंत भव्यदिव्य आणि शिस्तबद्ध पद्धतीने साजरा केला जाणार आहे. संध्याकाळी ६ वाजता श्री बालाजी महाराजांच्या मंदिरातून वाहन मिरवणुकीला सुरुवात होईल. ही मिरवणूक वाणी मंगल कार्यालय, आझाद चौक आणि झपाटभवानी मंदिराच्या दिशेने पुढे जाईल. झपाटभवानी मंदिरात देवी पद्मावतींची आरती करून मिरवणूक पुढे राम मंदिराकडे मार्गस्थ होईल. त्यानंतर कासार गल्लीमार्गे श्रावण दगडू भावसार यांच्या निवासस्थानासमोरून ही मिरवणूक रात्री १० वाजता पुन्हा बालाजी मंदिरात परतेल.
या उत्सवाच्या पहिल्या दिवशी गोसेवक ह.भ.प. माऊली महाराज बेलदारवाडी यांच्या कीर्तन सेवेचे खास आयोजन करण्यात आले आहे. बालाजी मंदिर परिसरात सायंकाळी ८ ते ११ या वेळेत ही कीर्तन सेवा होणार आहे. या माध्यमातून भाविकांना आध्यात्मिक अनुभूती घेता येईल. या सोहळ्यात सहभागी होऊन बालाजी महाराजांचा आणि कीर्तन सेवेचा लाभ घेण्यासाठी शहर आणि परिसरातील भाविकांनी मोठ्या संख्येने उपस्थित राहावे, असे आवाहन श्री बालाजी संस्थानने केले आहे.
गेल्या अनेक वर्षांपासून ही परंपरा सुरू असून, यामुळे शहराच्या सांस्कृतिक आणि धार्मिक जीवनात एक वेगळीच भर पडते. यंदाही हा उत्सव मोठ्या उत्साहात आणि आनंदात साजरा होईल अशी अपेक्षा आहे.
