नरेंद्र पाटील यांना जिल्हा क्रीडा पुरस्कार प्रदान

पाचोरा – लाईव्ह ट्रेंडस न्युज प्रतिनिधी । महाराष्ट्र शासनाच्या क्रीडा व युवक सेवा संचालनालय अंतर्गत जिल्हा क्रीडा अधिकारी कार्यालय, जळगाव यांच्या वतीने देण्यात येणारा जिल्हा क्रीडा पुरस्कार पाचोरा येथील श्री. गो. से. हायस्कूलचे पर्यवेक्षक नरेंद्र रामदास पाटील यांना देवून सन्मानित करण्यात आले आहे. प्रमाणपत्र, स्मृतिचिन्ह व दहा हजार रुपये रोख असे या पुरस्काराचे स्वरूप आहे.

जळगाव जिल्ह्याच्या क्रिडा क्षेत्रांमध्ये मोलाची कामगिरी करून जिल्ह्याची मान वृद्धिंगत केल्याबद्दल जळगाव जिल्ह्याचे पालकमंत्री ना. गुलाबराव पाटील यांच्या हस्ते नरेंद्र रामदास (ठाकरे) पाटील यांना बुद्धीबळ खेळ अंतर्गत गुणवंत क्रिडा मार्गदर्शक पुरस्कार सन्मानपूर्वक प्रदान करण्यात आला. दि. १ मे रोजी जळगाव जिल्हाधिकारी कार्यालयात संपन्न झालेल्या या पुरस्कार वितरण सोहळ्याला जिल्हाधिकारी अभिजित राऊत, पोलिस अधीक्षक डॉ. प्रवीण मुंडे, मुख्य कार्यकारी अधिकारी पंकज आशिया, अप्पर पोलिस अधिक्षक चंद्रकांत गवळी, जिल्हा क्रीडा अधिकारी मिलिंद दीक्षित, प्रदीप तळवलकर उपस्थित होते. नरेंद्र पाटील यांनी सपत्नीक उपस्थिती देऊन या पुरस्काराचा स्वीकार केला.

याप्रसंगी ज्योती पाटील, चिरंजीव आर्चीक पाटील, विद्यालयाचे पर्यवेक्षक ए. बी. अहिरे, धीरज विसपुते, आर. बी. तडवी, महेश कौण्डिण्य, आर. बी. बाँठिया, पी. एम. पाटील, आर. बी. बोरसे, अरुण कुमावत, सुबोध कांतायन व छाया सूर्यवंशी उपस्थित होते. नरेंद्र पाटील यांना मिळालेल्या प्रतिष्ठेच्या पुरस्काराबद्दल पाचोरा तालुका सहकारी शिक्षण संस्थेचे अध्यक्ष दिलीप वाघ, चेअरमन संजय वाघ, सचिव ॲड. महेश देशमुख, उपाध्यक्ष विलास जोशी, शालेय समितीचे चेअरमन खलील देशमुख, तांत्रिक विभागाचे प्रमुख वासुदेव महाजन तसेच पाचोरा तालुका बुद्धिबळ संघाचे अध्यक्ष दुष्यंत रावल, शाळेचे मुख्याध्यापक सुधीर पाटील, उपमुख्याध्यापिका प्रमिला वाघ, पर्यवेक्षक, शिक्षक व शिक्षकेतर कर्मचारी यांनी त्यांचे अभिनंदन केले आहे.

एन आर ठाकरे सरांचा परिचय –

नरेंद्र पाटील उर्फ एन.आर. ठाकरे यांचे शिक्षण बी. एस. सी. एम. पी. एड. झाले असून ते श्री. गो. से. हायस्कूल पाचोरा येथे क्रिडा विभाग प्रमुख आणि पर्यवेक्षक म्हणून कार्यरत आहेत. मागील तीस वर्षापासून बुद्धिबळ खेळाचे जिल्हा मार्गदर्शक म्हणून ते अहोरात्र परिश्रम घेत आहेत. जळगाव जिल्ह्यात “चेस इन स्कूल” हा उपक्रम सुरू करून ६५ शाळांमध्ये प्रत्यक्ष जाऊन त्यांनी बुद्धिबळ खेळाविषयी सखोल मार्गदर्शन विद्यार्थ्यांना केले आहे.

महाराष्ट्र राज्याच्या १४, १७ व १९ वर्षाआतील शालेय क्रिडा संघाचे क्रिडा मार्गदर्शक म्हणून ते सतत पंधरा वर्षांपासून मार्गदर्शन करीत आहेत. त्यांच्या अथक प्रयत्नाने जळगाव जिल्ह्याचे खेळाडू राष्ट्रीय पातळीवर चमकले असून त्यांच्या विद्यार्थ्यांना सुवर्णपदके व राष्ट्रीय विजेतेपद सुद्धा प्राप्त झालेले आहेत. त्यांच्या या सर्वंकष योगदानाचा विचार करून राज्य शासनाने त्यांना सन – २०२१ चा जिल्हा क्रिडा पुरस्कार देऊन गौरविले आहे.

 

 

आम्हाला विविध सोशल मंचावर फॉलो करा

Comments are closed, but trackbacks and pingbacks are open.

error: Content is protected !!