जळगाव-लाईव्ह ट्रेंड्स न्यूज प्रतिनिधी । जळगावातील अनुभूती निवासी स्कूल उद्या तायक्वांडोच्या चढाओढीने गजबजणार आहे. सीआयएससीई बोर्ड अंतर्गत ‘एच’ झोनल तायक्वांडो स्पर्धेचे आयोजन याच शाळेत दिनांक १९ जुलै रोजी होत असून, महाराष्ट्रातील सात जिल्ह्यांतील तब्बल ६० हून अधिक खेळाडू आपल्या कलेचे प्रदर्शन करण्यासाठी सज्ज झाले आहेत. ही स्पर्धा केवळ मैदानी लढाई नसून विद्यार्थ्यांच्या शारीरिक व मानसिक क्षमतेची कसोटीही ठरणार आहे.
१७ व १९ वर्षांखालील गटांमध्ये मुलं व मुलींच्या विविध प्रकारच्या लढती या दिवसभर रंगणार आहेत. या स्पर्धेत जालना, संभाजीनगर, नाशिक, पालघर, नंदुरबार, धुळे आणि जळगाव या जिल्ह्यांचे प्रतिनिधित्व करणारे सात संघ सहभागी होणार असून, प्रत्येक संघातून निवड झालेले खेळाडू सुवर्ण, रौप्य व कांस्यपदकांसाठी झुंजतील. या स्पर्धेचे उद्घाटन सकाळी ११ वाजता होणार आहे.
उद्घाटनप्रसंगी प्रमुख पाहुणे म्हणून अनुभूती स्कूलचे प्राचार्य देबासीस दास, जैन स्पोर्ट्स अकॅडमीचे अरविंद देशपांडे आणि महाराष्ट्र तायक्वांडो असोसिएशनचे अधिकृत पंच उपस्थित राहणार आहेत. खेळाडूंना प्रोत्साहन देण्यासाठी विविध क्षेत्रातील मान्यवरही उपस्थिती लावतील, अशी माहिती आयोजकांनी दिली आहे.
या स्पर्धेच्या यशस्वी आयोजनासाठी अनुभूती स्कूलचे अध्यक्ष अतुल जैन व संचालिका निशा जैन यांचे मार्गदर्शन लाभत असून, स्पर्धा संयोजनात अजित घारगे, जयेश बाविस्कर, सौ. स्मिता बाविस्कर, मुख्य पंच श्रेयांग खेकरे, पुष्पक महाजन आणि त्यांच्या सहकाऱ्यांचा मोलाचा सहभाग आहे. सर्वांच्या सामूहिक प्रयत्नातून स्पर्धा अधिक शिस्तबद्ध व देखणी व्हावी, यासाठी नियोजन करण्यात आले आहे.
ही स्पर्धा केवळ खेळगुणांचा उत्सव नाही, तर विद्यार्थ्यांमध्ये लढण्याची उमेद, आत्मविश्वास व शिस्त जोपासण्याचे एक प्रभावी माध्यम ठरणार आहे. तायक्वांडोप्रेमींनी व नागरिकांनी या स्पर्धेला उपस्थित राहून युवा खेळाडूंना प्रोत्साहन द्यावे, असे आवाहन आयोजकांनी केले आहे.
या झोनल स्पर्धेच्या माध्यमातून जळगावसह उत्तर महाराष्ट्रातील तायक्वांडो चळवळीला नवसंजीवनी मिळणार असल्याचे स्पष्ट संकेत मिळत आहेत.
