एरंडोल-लाईव्ह ट्रेंड्स न्यूज प्रतिनिधी । एरंडोल नगरपरिषद निवडणूक 2025 च्या पार्श्वभूमीवर शिवसेना-भाजप महायुतीने प्रचाराचा जोर वाढवला असून, नगराध्यक्ष आणि नगरसेवक पदांच्या अधिकृत उमेदवारांच्या समर्थनार्थ आयोजित जाहीर सभेला उत्स्फूर्त प्रतिसाद मिळाला. कार्यसम्राट म्हणून ओळख असलेले आमदार अमोल चिमणराव पाटील यांच्या प्रभावी भाषणाने वातावरण रंगून गेले.
महायुतीकडून नगराध्यक्ष पदाचे अधिकृत उमेदवार म्हणून डॉ. नरेंद्र ठाकूर यांची घोषणा झाली असून, प्रभाग क्रमांक १ (अ) मधून सौ. कल्पना ताई मनोज पाटील तर प्रभाग क्रमांक १ (ब) मधून श्री. अभिजीत राजेंद्र पाटील हे उमेदवार रिंगणात उतरले आहेत. या तिन्ही उमेदवारांच्या प्रचारार्थ आयोजित सभेला शिवसेना आणि भाजपा पदाधिकारी, कार्यकर्ते तसेच मोठ्या संख्येने नागरिक उपस्थित होते.
सभेमध्ये आमदार अमोल पाटील यांनी एरंडोलच्या सर्वांगीण विकासाचे आश्वासन देत महायुतीचे उमेदवारच शहराला सक्षम आणि पारदर्शक नेतृत्व देऊ शकतात, असे सांगितले. लोकांच्या मूलभूत सुविधांपासून ते प्रगतिशील प्रकल्पांपर्यंत सर्व क्षेत्रात बदल घडवण्याची क्षमता या उमेदवारांत असल्याचे त्यांनी स्पष्ट केले. त्यांच्या उपस्थितीने सभेला विशेष ऊर्जा मिळाली असून, मोठ्या संख्येने उपस्थितांनी घोषणाबाजी करत उमेदवारांना जोरदार प्रतिसाद दिला.
महायुतीच्या पदाधिकाऱ्यांनी एकमुखाने आवाहन केले की, प्रभाग क्रमांक एकमधील सर्व नागरिकांनी आपल्या उमेदवारांना भक्कम मतांनी विजयी करून विकासाचा मार्ग सुकर करावा. सभेतील उत्साह, कार्यकर्त्यांचा सहभाग आणि नागरिकांचा ओघ पाहता, महायुतीचा प्रचार अधिक वेगाने पुढे जात असल्याचे स्पष्ट झाले.
उमेदवारांनीही सभेत आपल्या भावना व्यक्त करत नागरिकांच्या विश्वासास पात्र राहून विकासाची गती वाढवण्याचे वचन दिले. दरम्यान, वार्डातील अनेक नागरिकांनी उमेदवारांना प्रत्यक्ष भेटून समर्थन दर्शवले.
एरंडोलमधील महायुतीचा प्रचार दिवसेंदिवस जोम धरत असून, नगरपरिषद निवडणुकीची लढत अधिकच रंगणार आहे.
