वॉशिंग्टन- वृत्तसेवा । अमेरिका आणि इराण यांच्यात सुरू असलेला संघर्ष दिवसेंदिवस अधिक तीव्र होत असून युद्धाच्या सातव्या दिवशी अमेरिकेकडून इराणवर सर्वात मोठा हल्ला करण्याची थेट धमकी देण्यात आली आहे. या इशाऱ्यामुळे आंतरराष्ट्रीय स्तरावर मोठी खळबळ उडाली असून मध्यपूर्वेतील परिस्थिती अधिक गंभीर बनण्याची शक्यता व्यक्त केली जात आहे. या संघर्षाचा परिणाम केवळ या दोन देशांपुरता मर्यादित न राहता जगभरातील अर्थव्यवस्था, तेल बाजार आणि महागाईवरही दिसू लागला आहे.
28 फेब्रुवारी 2026 पासून सुरू झालेल्या या युद्धात अमेरिका आणि इस्रायल संयुक्तपणे इराणवर हवाई हल्ले करत आहेत. त्याला प्रत्युत्तर म्हणून इराणकडूनही इस्रायल तसेच अमेरिकेच्या लष्करी तळांवर जोरदार हल्ले करण्यात येत आहेत. अलीकडेच अमेरिकेच्या सैन्याचे तळ असलेल्या एका महत्त्वाच्या हवाई तळावर इराणने मोठा हल्ला केल्याची माहिती समोर आली आहे. या हल्ल्यात काही सैनिक जखमी झाल्याचीही प्राथमिक माहिती मिळाली आहे.
या संघर्षाची पार्श्वभूमी अधिक गंभीर ठरली ती म्हणजे अमेरिका आणि इस्रायलने केलेल्या संयुक्त हवाई कारवाईमध्ये इराणचे सर्वोच्च नेते अयातुल्ला अली खामेनी यांचा मृत्यू झाल्याचा दावा करण्यात आला. या घटनेनंतर इराणमध्ये संतापाची लाट उसळली असून परिस्थिती अधिक तणावपूर्ण बनली आहे. त्यानंतर इराणच्या मोठ्या शहरांना लक्ष्य करत हवाई हल्ले करण्यात येत असल्याचेही वृत्त आहे. अमेरिकेचा उद्देश कोणत्याही परिस्थितीत इराणची लष्करी ताकद कमकुवत करणे आणि त्यावर नियंत्रण मिळवणे हा असल्याचे सांगितले जात आहे.
दरम्यान, युद्ध अधिक तीव्र करण्याचा इशारा देताना अमेरिकेच्या संरक्षण व्यवस्थेतील वरिष्ठ अधिकारी स्कॉट बेसेंट यांनी मोठे वक्तव्य केले आहे. त्यांनी म्हटले की, “आज मध्यरात्री इराणविरोधात आमची सर्वात मोठी बॉम्बहल्ला मोहीम सुरू होईल.” या कारवाईत इराणची क्षेपणास्त्र प्रणाली, लॉन्चर आणि क्षेपणास्त्र तयार करणारे कारखाने लक्ष्य केले जाणार असल्याचे त्यांनी स्पष्ट केले.
अमेरिकेच्या मते, इराणकडून होत असलेले हल्ले कमकुवत करण्यासाठी ही कारवाई आवश्यक आहे. गेल्या काही दिवसांपासून सुरू असलेल्या हवाई हल्ल्यांमुळे इराणची लष्करी क्षमता काही प्रमाणात कमी झाली असल्याचा दावा अमेरिकेने केला आहे. मात्र आज रात्री होणाऱ्या मोठ्या कारवाईमुळे इराणला आणखी मोठे नुकसान सहन करावे लागेल, असा इशाराही देण्यात आला आहे.
अमेरिकेच्या या थेट धमकीनंतर मध्यपूर्वेत आणि जगभरात मोठी खळबळ उडाली आहे. आतापर्यंत अमेरिका आणि इस्रायलने इराणच्या राजधानी तेहरानसह अनेक महत्त्वाच्या शहरांवर हल्ले केले असून त्यात मोठ्या प्रमाणावर नुकसान झाल्याचे वृत्त आहे. विविध अहवालांनुसार, आतापर्यंत अमेरिकेकडून इराणवर तीन हजारांहून अधिक हल्ले करण्यात आले आहेत.
या युद्धात आंतरराष्ट्रीय पातळीवरही मोठे राजकीय समीकरण तयार होताना दिसत आहे. रशिया आणि चीनसारख्या शक्तिशाली देशांनी अद्याप इराणला उघडपणे लष्करी मदत केलेली नाही. उत्तर कोरिया इराणचा जवळचा मित्र मानला जात असला तरी सध्या तोही या संघर्षात तटस्थ भूमिका घेत असल्याचे दिसत आहे. त्यामुळे इराण सध्या मोठ्या दबावाखाली असल्याचे विश्लेषण तज्ज्ञांकडून केले जात आहे.
