जळगाव-लाईव्ह ट्रेंडस न्यूज प्रतिनिधी | माजी विद्यार्थ्यांनी आपली यशोगाथा सांगत त्यांच्या कारकिर्दीतील अनुभव शेअर करून यशाचा मंत्र देत गोदावरी अभियांत्रिकी महाविद्यालयात अल्युम्नी मीटचा कार्यक्रम नुकताच उत्साहात पार पडला. या कार्यक्रमाची सुरुवात सरस्वती पूजन आणि दीपप्रज्वलनाने झाली. या प्रसंगी अल्युम्नी असोसिएशनचे अध्यक्ष प्रा. के. एम. महाजन यांनी उपस्थितांचे स्वागत करत अल्युम्नी मीटचे उद्दिष्ट स्पष्ट केले.
कार्यक्रमाला महाविद्यालयाचे प्राचार्य डॉ. विजयकुमार पाटील, उपप्राचार्य प्रा. पी. व्ही. फालक, अधिष्ठाता डॉ. हेमंत इंगळे, प्रशिक्षण व प्लेसमेंट अधिकारी डॉ. विजयकुमार वानखेडे, निबंधक डॉ. ईश्वर जाधव, तसेच सर्व विभागप्रमुख आणि प्राध्यापकवृंद उपस्थित होते. प्राचार्य डॉ. पाटील यांनी महाविद्यालयाच्या प्रगतीविषयी माहिती देताना माजी विद्यार्थ्यांना संस्थेशी कायम जोडले राहून महाविद्यालयाच्या विकासात योगदान देण्याचे आवाहन केले. तर डॉ. वानखेडे यांनी उद्योगातील सध्याचे नवीन तंत्रज्ञान आणि नोकरीच्या संधी यावर माहितीपूर्ण संवाद साधला.
माजी विद्यार्थ्यांनी आपल्या यशोगाथा सांगताना कारकिर्दीतील अनुभव शेअर केले. काहींनी स्टार्टअप्स आणि उद्योजकतेबाबत माहिती दिली, तर काहींनी त्यांच्या क्षेत्रातील नवे बदल आणि संधी यावर मार्गदर्शन केले. यासोबतच त्यांनी महाविद्यालयीन आठवणींना उजाळा देत गोदावरी अभियांत्रिकी महाविद्यालयाने दिलेल्या शिक्षणाचा त्यांच्या यशात कसा महत्त्वाचा वाटा आहे, हे अधोरेखित केले. कार्यक्रमाचे नियोजन अल्युम्नी असोसिएशनचे अध्यक्ष प्रा. किशोर महाजन यांनी केले, तर सूत्रसंचालन प्रा. रेश्मा अत्तरदे यांनी उत्तमरीत्या पार पाडले. हा कार्यक्रम माजी विद्यार्थी आणि महाविद्यालय यांच्यातील बंध दृढ करणारा ठरला.
