सावदा, ता. रावेर-लाईव्ह ट्रेंडस न्यूज प्रतिनिधी | गावठी पिस्तुलाचा धाक दाखवून दोघांकडून भर दिवसा दीड लाख रूपयांची लूट करण्यात आल्याची घटना सावदा शहराजवळ घडली असून या प्रकरणी बऱ्हाणपूरचा कुख्यात गुंड अज्जू डॉन आणि त्याच्या साथीदारांच्या विरोधात गुन्हा नोंदविण्यात आला आहे.
या संदर्भातील वृत्त असे की, भुसावळच्या मुस्लीम कॉलनी भागातील रहिवासी असलेले साजीद शेख अकबर हे आपले मित्र बबलू खान अय्यूब खान यांच्यासह निंभोरी येथील एकाकडून टायरचे दीड लाखांचे पेमेंट घेऊन सावद्याहून स्कूटीवरून भुसावळ येथे येत होते. सायंकाळी साडेचार वाजेच्या सुमारास सावदा ते पिंपरूडच्या दरम्यान स्मशानभूमिच्या पुढे पांढऱ्या रंगाच्या तवेरा कारमधून काही जण खाली उतरले. यात अज्जू डॉन बऱ्हाणपूरवाला, तौसीफ (पूर्ण नाव माहित नाही ) यांच्यासह तीन अनोळखी लोक होते.
यातील अज्जू डॉन याने त्यांची स्कूटी अडवून गावठी पिस्तुलाचा धाक दाखवून जिवे मारण्याची धमकी देत दीड लाख रूपये घेऊन पलायन केले. या प्रकरणी साजीद शेख अकबर यांनी सावदा पोलीस स्थानकात फिर्याद दिली. यानुसार, अज्जू डॉन बऱ्हाणपूरवाला, तौसीफ ( पूर्ण नाव माहित नाही ) आणि तीन अनोळखी तरूण यांच्या विरोधात गुरन 211/2025, भारतीय न्याय संहीता सन 2023 चे कलम- 310(2),311,115 (2), 351(2) (3), 352, सह शस्त्र अधिनियम सन 1959 चे कलम 3/25 या कलमांच्या अन्वये गुन्हा दाखल करण्यात आला आहे.
या प्रकरणाचा पुढील तपास उपविभागीय पोलीस अधिकारी अनिल बडगुजर यांच्या मार्गदर्शनाखाली सपोनि विशाल पाटील, उपनिरिक्षक अमोल गर्जे आणि राहूल सानप हे करीत आहेत. या प्रकरणामुळे परिसरात खळबळ उडाली आहे.
