जळगाव – लाईव्ह ट्रेंड्स न्यूज प्रतिनिधी । गोदावरी कॉलेज ऑफ नर्सिंग, जळगाव तर्फे जीआयएनआर फाउंडेशन यांच्या संयुक्त विद्यमाने नुकतेच एसीएलएस (Advanced Cardiac Life Support), बीएलएस (Basic Life Support) आणि पीएलएस (Pediatric Life Support) या विषयांवरील अॅडव्हान्स स्किल वर्कशॉप यशस्वीरीत्या पार पडले. या उपक्रमाचे उद्दिष्ट विद्यार्थ्यांना आपत्कालीन वैद्यकीय परिस्थितीत तातडीने आणि प्रभावीपणे प्रतिसाद देण्यासाठी आवश्यक कौशल्ये आत्मसात करणे हे होते.
या कार्यशाळेचे आयोजन मेडिकल-सर्जिकल नर्सिंग विभाग आणि फंडामेंटल ऑफ नर्सिंग विभाग यांच्या संयुक्त विद्यमाने करण्यात आले. कार्यशाळेत प्राध्यापक, पदवीधर आणि पदव्युत्तर विद्यार्थी यांनी उत्स्फूर्त सहभाग घेतला. प्रशिक्षण सत्रात सहभागी विद्यार्थ्यांना आपत्कालीन परिस्थितीत रुग्णांची काळजी कशी घ्यावी, सीपीआर (Cardiopulmonary Resuscitation) चे योग्य तंत्र कसे वापरावे तसेच आरोग्य सेवेत टीमवर्कचे महत्त्व या विषयांवर सखोल मार्गदर्शन देण्यात आले.
कार्यशाळेसाठी संसाधन व्यक्ती म्हणून बलराम कथलिया (मुख्य सिम्युलेटर इन्स्ट्रक्टर) आणि मिस स्टेफी अब्राहम (सहायक प्राध्यापक) यांनी विद्यार्थ्यांना प्रत्यक्ष प्रात्यक्षिकांद्वारे प्रशिक्षण दिले. त्यांनी विद्यार्थ्यांना आपत्कालीन परिस्थितीत योग्य निर्णय घेणे, तत्काळ वैद्यकीय उपाययोजना करणे आणि एकत्रित कार्यसंघ म्हणून कार्य करण्याचे महत्त्व पटवून दिले.
या उपक्रमामुळे विद्यार्थ्यांच्या वैद्यकीय ज्ञानात आणि आत्मविश्वासात मोठी वाढ झाली असल्याचे उपस्थितांनी सांगितले. शिक्षकवर्ग आणि विद्यार्थ्यांच्या समन्वयाने या वर्कशॉपचे आयोजन अत्यंत यशस्वीरीत्या पार पडले. संस्थेच्या प्राचार्या आणि आयोजन समितीने यशस्वी कार्यशाळेसाठी सर्व सहभागींचे अभिनंदन केले.
