मुंबई-लाईव्ह ट्रेंडस न्यूज वृत्तसेवा | मुंबईच्या गोरेगाव येथे शुक्रवारी १० ऑगस्ट रोजी सकाळी धक्कादायक घडली. मित्रांसोबत पोहायला गेलेल्या १८ वर्षीय तरुणाचा पाण्यात बुडून मृत्यू झाला. याप्रकरणी स्थानिक पोलिसांनी अकस्मात मृत्यूची नोंद केली असून पुढील चौकशीला सुरूवात केली. मिळालेल्या माहितीनुसार, मृत तरुणाला पोहता येत नसतानाही पाण्यात उतरला आणि त्याला आपला जीव गमवावा लागला. या घटनेने परिसरात शोककळा परसली आहे.
साहिल अन्सारी असे १८ वर्षीय मृत्यू झालेल्या तरूणाचे नाव आहे. साहिल हा गोरेगाव पूर्व येथील आदर्श नगर येथील रहिवासी होता. दरम्यान, शुक्रवारी सकाळी दहा वाजताच्या सुमारास तो त्याच्या मित्रांसोबत दहिसर पूर्व येथील वैशाली नगर येथील एका खाणीत गेला. पोहता येत नसतानाही तो पाण्यात उतरला. परंतु, अंदाज न आल्याने तो पाण्यात बुडाला. यानंतर त्याच्या मित्रांनी १०० क्रमांकावर फोन करून याबाबत पोलिसांना माहिती दिली. दुपारी १२.३० वाजताच्या सुमारास साहिल पाण्यात बुडाला. त्यानंतर तब्बल चार तासानंतर पावणे पाच वाजता त्याला पाण्यातून बाहेर काढले आणि त्याला त्वरीत जवळच्या शताब्दी रुग्णालयात दाखल केले. मात्र, डॉक्टरांनी उपचारापूर्वीच त्याला मृत घोषित केले. याप्रकरणी पोलिसांनी साहिलच्या वडिलांचा जबाब नोंदवून घेतला आहे. त्यांनी कोणत्याही प्रकारचा अपप्रचार नाकारला आणि कोणाविरुद्धही तक्रार दाखल केली नाही.
