छत्रपती संभाजीनगर-लाईव्ह ट्रेंडस न्यूज वृत्तसेवा | दहा हजार रुपयांची लाच घेतल्याप्रकरणी तलाठ्यासह एका खासगी व्यक्तीला ताब्यात घेण्यात आले असून, दोघांविरोधात गंगापूर पोलीस ठाण्यात बुधवारी सायंकाळी गुन्हा दाखल करण्यात आला आहे. छत्रपती संभाजीनगरच्या लाचलुचपत प्रतिबंधक विभागाच्या पथकाने ही कारवाई केली.
प्रवीण अशोक दिलवाले व बद्रीनाथ लक्ष्मण चव्हाण अशी लाच स्वीकारणाऱ्या अनुक्रमे तलाठी व खासगी व्यक्तीची नावे आहेत. प्रवीण दिलवाले हा काटे पिंपळगाव सज्जाचा तलाठी आहे. तर बद्रीनाथ हा शेतकरी आहे. तक्रारदार यांचे वडील व चुलत भाऊ यांची वारसा हक्काने नोंद घेऊन सात बारा देण्यासाठी आरोपींनी पंचासमक्ष दहा हजार रुपये लाचेची मागणी केली. तलाठ्याने बद्रीनाथकडे दहा हजार देण्याचे तक्रारदारास सांगितले होते. सापळा अधिकारी तथा पोलीस निरीक्षक अमोल धस यांच्या पथकाने ही कारवाई केली.
