जळगाव लाईव्ह ट्रेंडस न्यूज प्रतिनिधी । जळगाव शहरातील शनिपेठ पोलिस स्टेशनच्या हद्दीतील एका नामवंत सोन्याच्या दालनात एका ग्राहकाने २२ कॅरेट सोन्याचे दागिने भासवत, ते दालनामध्ये विकून, त्याच्या बदल्यात २ लाख १३ हजार रुपयांचे दागिने घेऊन सोने विक्री दालन मालकाची एकूण १ लाख ७७ हजार रुपयांमध्ये फसवणूक केल्याचा प्रकार रविवारी ३० मार्च रोजी दुपारी २ वाजता घडला आहे. या प्रकरणी बुधवार २ एप्रिल रोजी रात्री ९ वाजता शनिपेठ पोलिस ठाण्यात एका अज्ञाताविरुद्ध फसवणुकीचा गुन्हा दाखल करण्यात आला आहे.
याबाबत अधिक माहिती अशी की, गुढीपाडव्याच्या दिवशी शनिपेठ पोलीस ठाण्याच्या हद्दीतील एका नामवंत ज्वेलर्स सोने विक्रीच्या दालनात बुधवारी रविवारी ३० मार्च दुपारी १२.३० वाजेच्या सुमारास ३० ते ३५ वयोगटातील एक ग्राहक, सोन्याचे मोड काऊंटरवर आला. त्याठिकाणी प्रत्यक्षात ३६ हजार रुपये किंमतीची २५ ग्रॅम वजनाची १५.५ टक्के शुद्धता असलेली सोन्याची चैन व पेडंटवर ९१.६ चा हॉलमार्क मारुन ती २२ कॅरेट असल्याचे भासवून, ही चैन त्या सोन्याच्या दुकानात मोडून त्या बदल्यात १ लाख ९४ हजार किंमतीचा सोन्याचा हार, १८ हजार रुपये किंमतीचे कानातले दागिणे व २ ग्रॅम सोन्याचा कॉईन असा २ लाख १३ हजार ३४८ रुपयांचा सोन्याचा माल खरेदी करून, सोन्याचे दालन असलेल्या मालकाची एकूण १ लाख ७७ हजार रुपयांमध्ये फसवणूक केली. या प्रकरणी मनोज हुकूमचंद जैन यांच्या फिर्यादीवरुन शनिपेठ पोलिस ठाण्यात एका अज्ञात व्यक्तीविरुद्ध गुन्हा दाखल करण्यात आला आहे. पुढील तपास पोलिस निरीक्षक रंगनाथ धारबळे हे करत आहेत.
