बीजिंग वृत्तसंस्था । चीनने राष्ट्रीय स्तरापासून ते प्रांत आणि शहरांच्या समुदायापर्यंत एक आरोग्य यंत्रणा तयार केली आहे. त्यामुळे माहिती आणि अनुभवाचे आदान-प्रदान करणे सोपे जाते. या आरोग्य व्यवस्थेने कोरोनाविरोधातील लढाईत महत्त्वाची भूमिका बजावली आहे. दुसरी गोष्ट म्हणजे चीनच्या लोकांनी या लढाईत आपली वैयक्तिक जबाबदारी ओळखली आणि ती पार पाडली.
तिसरी गोष्ट म्हणजे संसर्गाला अटकाव करण्यासाठी चीनच्या अधिकाऱ्यांनी विविध स्तरांवर सजग राहून घेतलेले निर्णय आणि बजावलेले कर्तव्य महत्त्वाचे ठरले आहे. या तीन गोष्टींच्या आधारे चीनने कोरोनावर नियंत्रण मिळवले, असे जागतिक आरोग्य संघटनेचे म्हणणे आहे
कोरोनाचा संसर्ग जगभरात पहिल्यांदा चीनमध्ये फैलावला. त्यानंतर आता चीनने करोनावर नियंत्रण मिळवल्याची परिस्थिती आहे. चीनमध्ये मागील काही दिवसांमध्ये बाधितांची संख्या सातत्याने कमी होत आहे. चीनने लस विकसित केली असून आपल्या नागरिकांना गुप्तपणे ही लस दिली जात असल्याचाही आरोप करण्यात आला होता.
या दरम्यान, जागतिक आरोग्य संघटनेने चीनने संसर्गावर मात करण्यासाठी केलेल्या उपायाबाबतचे सत्य जगासमोर मांडले आहे. चीनविरोधात कोरोनाच्या मुद्यावरून अमेरिकेने आरोपांची राळ उठवली होती. त्यानंतर चीन आणि अमेरिकेतील संबंध आणखीच तणावाचे झाले. संसर्गामुळे जगभरातील जवळपास २०० देश हैराण झाले आहेत. लस विकसित करण्याचे प्रयत्न सुरू आहेत.
जागतिक आरोग्य संघटनेचे वरिष्ठ सल्लागार ब्रूस आयलवर्ड यांनी ७ सप्टेंबर रोजी आयोजित केलेल्या पत्रकार परिषदेत म्हटले की, चीनमध्ये मागील सलग २० दिवसांपासून एकही नवीन स्थानिक बाधित आढळला नाही. ही अतिशय महत्त्वाची बाब आहे. कोविड-१९ महासाथी दरम्यान त्यांनी आंतरराष्ट्रीय तज्ञांच्या पथकासोबत चीनचा दौरा केला होता. तीन महत्त्वाच्या गोष्टींमुळे चीनला मोठे यश मिळाले असल्याचे त्यांनी सांगितले.
कोरोनाच्या काळात पारदर्शकपणे काम केले असल्याचे चीनचे राष्ट्रपती शी जिनपिंग यांनी म्हटले. चीनने ठोस पावले उचलल्यामुळे जगभरातील कोट्यवधी जणांचे प्राण वाचले. जिनपिंग यांनी चीनच्या प्रशासनाने केलेल्या कार्याचे कौतुक केले. अमेरिकेने जागतिक आरोग्य संघटनेवर टीका केली असली तर जिनपिंग यांनी संघटनेला आपला पाठिंबा दर्शवला.
डिसेंबर २०१९ मध्ये वुहान शहरात कोरोनाची बाधा झालेला पहिला रुग्ण आढळला होता. चीनने माहिती लपवल्यामुळे जगभरात संसर्ग वेगाने फैलावला असल्याचा आरोप अमेरिका आणि इतर देशांनी केला. तर, चीनने हे आरोप फेटाळून लावले. कोणतीही माहिती लपवली नसून याउलट अधिक जबाबदारीने आपली भूमिका बजावली असल्याचे चीनने म्हटले. संसर्गाची चौकशी करण्यात येत असून जागतिक आरोग्य संघटनेच्या एक पथकाने चीनलाही नुकतीच भेट दिली.
