Home Cities जळगाव रुग्णवाहिका बंद, जेसीबी निकामी; मनपाच्या निष्क्रिय कारभारावर उपमहापौरांचा संताप

रुग्णवाहिका बंद, जेसीबी निकामी; मनपाच्या निष्क्रिय कारभारावर उपमहापौरांचा संताप

0
15

जळगाव-लाईव्ह ट्रेंड्स न्यूज प्रतिनिधी । जळगाव शहर महानगरपालिकेच्या नागरी आणि अत्यावश्यक सेवा अधिक गतिमान करण्याच्या दृष्टीने बुधवारी, दि. १८ नोव्हेंबर रोजी उपमहापौर मनोज चौधरी  यांच्या अध्यक्षतेखाली वाहन विभागाची महत्त्वपूर्ण आढावा बैठक पार पडली. या बैठकीत महानगरपालिकेच्या ताफ्यातील नादुरुस्त व बंद अवस्थेतील वाहनांची गंभीर दखल घेत, ही सर्व वाहने तातडीने दुरुस्त करून पुन्हा सेवेत दाखल करण्याचे स्पष्ट निर्देश उपमहापौरांनी संबंधित अधिकाऱ्यांना दिले आहेत.

या आढावा बैठकीस वाहन विभाग प्रमुख संदीप मोरे, वाहन विभागाच्या उपायुक्त निर्मला गायकवाळ, अग्निशमन विभाग प्रमुख अश्वजित घरडे, अग्निशमन विभागाचे भरत बारी, अग्निशमन विभागाचे उपायुक्त पंकज गोसावी आणि सहाय्यक आयुक्त संजय राऊत यांच्यासह संबंधित अधिकारी उपस्थित होते. बैठकीदरम्यान महानगरपालिकेच्या एकूण वाहनांच्या सद्यस्थितीचा सविस्तर आढावा घेण्यात आला. यावेळी अधिकाऱ्यांनी दिलेल्या माहितीनुसार, मनपाच्या एकूण वाहनांपैकी जे.सी.बी., रुग्णवाहिका आणि पोकलेन यांसारखी ४ महत्त्वाची वाहने सध्या बंद अवस्थेत असल्याचे समोर आले, तर इतर काही वाहनांना किरकोळ व मोठ्या स्वरूपाच्या दुरुस्तीची आवश्यकता असल्याचे निदर्शनास आले.

या परिस्थितीवर भाष्य करताना उपमहापौर चौधरी यांनी बंद पडलेली सर्व वाहने तसेच अग्निशमन विभागासह अत्यावश्यक सेवांमध्ये वापरली जाणारी वाहने प्राधान्याने आणि युद्धपातळीवर दुरुस्त करून कार्यान्वित करण्याच्या सूचना दिल्या. तसेच वाहनांच्या देखभाल व दुरुस्ती प्रक्रियेत काही प्रशासकीय किंवा तांत्रिक त्रुटी असतील, तर त्यांची त्वरित दखल घेऊन सुधारणा करावी आणि सर्व वाहनांची नियमित तपासणी व देखभाल व्हावी, असेही त्यांनी स्पष्ट केले.

महानगरपालिकेची वाहने ही शहरातील दैनंदिन नागरी सुविधा, स्वच्छता मोहीम, आरोग्य आणि आपत्कालीन सेवांसाठी अत्यंत कळीची भूमिका बजावत असतात. त्यामुळे कोणतेही वाहन केवळ दुरुस्तीअभावी पडून राहणार नाही, याची विशेष दक्षता संबंधित विभागाने घ्यावी. वाहनांच्या कमतरतेमुळे जळगावकर नागरिकांना मिळणाऱ्या अत्यावश्यक सेवांमध्ये कोणताही अडथळा निर्माण होऊ नये, यासाठी वाहन विभागाने अधिक कार्यक्षमतेने काम करावे, असे सक्त निर्देश उपमहापौरांनी यावेळी दिले.

जळगाव शहर महानगरपालिकेच्या वाहन विभागाचा उपमहापौरांच्या अध्यक्षतेखाली आढावा घेण्यात आला असून, यात जेसीबी, रुग्णवाहिका व पोकलेन अशी ४ वाहने बंद असल्याचे समोर आले आहे. अत्यावश्यक आणि आपत्कालीन नागरी सेवांमध्ये कोणताही अडथळा येऊ नये यासाठी बंद व नादुरुस्त वाहने प्राधान्याने दुरुस्त करून नियमित देखभाल करण्याचे निर्देश उपमहापौरांनी अधिकाऱ्यांना दिले आहेत.

Protected Content

Play sound