रावेर-लाईव्ह ट्रेंड्स न्यूज प्रतिनिधी । रावेर नगर परिषदेच्या सर्वसाधारण सभेत शहराच्या विकासाशी संबंधित विविध महत्त्वपूर्ण विषयांवर चर्चा होऊन एकूण ३७ विषयांना मंजुरी देण्यात आली. अमृत २.० योजनेतील कामांना मुदतवाढ देणे, नगरपालिकेच्या जागेवर बीओटी तत्त्वावर शॉपिंग कॉम्प्लेक्स उभारणे, शहरातील रस्ते व गटारींची कामे आणि नगरपालिकेच्या नवीन इमारतीवर सौरऊर्जा प्रकल्प उभारणे यांसारख्या विषयांचा यात समावेश आहे. मात्र, सभेचे वार्तांकन करण्यासाठी आलेल्या पत्रकारांना सभागृहात प्रवेश नाकारण्यात आल्याने या निर्णयावरून पत्रकार वर्तुळात नाराजी व्यक्त करण्यात आली.
नगराध्यक्षा संगीता महाजन यांच्या अध्यक्षतेखाली ही सर्वसाधारण सभा पार पडली. सभेत शहरात सुरू असलेल्या अमृत २.० योजनेच्या कामांचा आढावा घेण्यात आला. या योजनेअंतर्गत सुरू असलेल्या कामांना मुदतवाढ देण्याच्या प्रस्तावावर चर्चा करून त्यास मंजुरी देण्यात आली. योजनेतील कामे पूर्ण करण्यासाठी मुदतवाढ देण्याचा निर्णय महत्त्वाचा मानला जात आहे. नगरपालिकेच्या नवीन इमारतीवर सौरऊर्जा प्रकल्प उभारण्याचाही विषय सभेत मांडण्यात आला. सौरऊर्जा प्रकल्पामुळे पालिकेच्या वीज वापरासंदर्भात पर्यायी ऊर्जा व्यवस्थेला चालना मिळण्याची अपेक्षा आहे. याशिवाय नगरपालिकेच्या मालकीच्या जागेवर बीओटी (बांधा, वापरा आणि हस्तांतरित करा) तत्त्वावर शॉपिंग कॉम्प्लेक्स उभारण्याच्या प्रस्तावावरही चर्चा झाली. या प्रकल्पामुळे शहरातील व्यावसायिक सुविधांमध्ये वाढ होण्याची शक्यता आहे.

शहरातील विविध भागांतील रस्त्यांची दुरुस्ती व नवीन रस्त्यांची कामे, तसेच गटारींच्या बांधकामांसंदर्भातील प्रस्तावांनाही सभेची मंजुरी मिळाली. शहरातील मूलभूत सुविधांचा विकास आणि नागरी समस्या सोडविण्याच्या दृष्टीने या विषयांना महत्त्व असल्याचे मानले जात आहे. अशा विविध विकासकामांसह एकूण ३७ विषय सभेत मंजूर करण्यात आले. या सभेला मुख्याधिकारी अविनाश गांगुर्डे यांच्यासह नगरपालिकेच्या विविध विभागांचे प्रमुख आणि सर्व नगरसेवक उपस्थित होते. सभेत मंजूर झालेल्या विषयांची प्रत्यक्ष अंमलबजावणी कधी सुरू होते आणि विकासकामे किती कालावधीत पूर्ण होतात, याकडे आता रावेरकरांचे लक्ष लागले आहे.
दरम्यान, या सर्वसाधारण सभेच्या वार्तांकनासाठी नेहमीप्रमाणे पत्रकार नगरपालिकेत आले होते. मात्र, यावेळी नगरपालिकेचे प्रशांत कोकाटे यांनी नगराध्यक्षा आणि मुख्याधिकारी यांच्याकडून पत्रकारांनी सभेला उपस्थित राहू नये, असा निरोप असल्याचे सांगितले. त्यामुळे सभेचे वार्तांकन करण्यासाठी आलेल्या पत्रकारांना सभागृहात प्रवेश मिळू शकला नाही. विशेष म्हणजे, सभेदरम्यान काही नगरसेवकांनी पत्रकारांना सभागृहात बसू देण्याची मागणी केल्याची माहिती समोर आली आहे. तरीही पत्रकारांना सभागृहात प्रवेश देण्यात आला नाही. शहराच्या विकासाशी संबंधित महत्त्वाचे निर्णय ज्या सभेत घेतले जातात, त्या सभेचे कामकाज नागरिकांपर्यंत पोहोचविण्यात पत्रकारांची महत्त्वाची भूमिका असते. अशा परिस्थितीत पत्रकारांना प्रवेश नाकारल्याने सभेच्या कामकाजातील पारदर्शकतेबाबतही प्रश्न उपस्थित होत आहेत.



