जळगाव-लाईव्ह ट्रेंड्स न्यूज प्रतिनिधी । हरियाणातील पानिपत येथे आयोजित करण्यात आलेल्या ७९ व्या संत निरंकारी आंतरराष्ट्रीय संत समागमासाठी जळगाव जिल्ह्यातून हजारो भाविक रवाना झाले आहेत. भाविकांची प्रवासातील गैरसोय दूर करण्यासाठी जळगाव रेल्वे स्थानकावरून दोन विशेष रेल्वे गाड्या रवाना करण्यात आल्या. या सुविधेमुळे भाविकांमध्ये आनंदाचे वातावरण असून, समागमात सहभागी होण्यासाठी भाविकांचा उत्साह पाहायला मिळत आहे.
हरियाणातील पानिपत जिल्ह्यातील समालखा ग्राउंडवर २३ ते २६ ऑक्टोबरदरम्यान ७९ व्या संत निरंकारी आंतरराष्ट्रीय संत समागमाचे आयोजन करण्यात आले आहे. या भव्य आध्यात्मिक सोहळ्यासाठी देशभरातून सुमारे २५ लाख भाविक उपस्थित राहण्याचा अंदाज व्यक्त करण्यात आला आहे. त्यामुळे विविध राज्यांतून समागमस्थळी जाणाऱ्या भाविकांची मोठी लगबग सुरू आहे. समागमासाठी जाणाऱ्या अनेक भाविकांना ऐनवेळी नियमित रेल्वे गाड्यांचे आरक्षण मिळत नसल्याने प्रवासात अडचणी येत होत्या. जळगाव आणि परिसरातील भाविकांची ही गैरसोय लक्षात घेऊन दोन विशेष रेल्वे गाड्यांची व्यवस्था करण्यात आली. या गाड्यांमुळे मोठ्या संख्येने भाविकांना पानिपतपर्यंतचा प्रवास करणे सुलभ झाले आहे. विशेष रेल्वे सुविधेमुळे भाविकांनी समाधान व्यक्त केले.
जळगाव रेल्वे स्थानकावर या विशेष रेल्वे गाड्यांना भाजपचे गटनेते प्रकाश बालानी, नगरसेवक विशाल भोळे, रेल्वेचे अधिकारी तसेच संत निरंकारी मंडळाचे संत प्रचारक राजकुमार वाणी, रमेश कुमार आहुजा, विशाल वाणी आणि लखन राठोड यांच्या हस्ते संयुक्तपणे हिरवी झेंडी दाखवण्यात आली. यावेळी समागमासाठी निघालेल्या भाविकांमध्ये उत्साहाचे वातावरण होते. संत निरंकारी आंतरराष्ट्रीय संत समागम हा आध्यात्मिक विचार, मानवता, प्रेम, बंधुभाव आणि विश्वशांतीचा संदेश देणारा सोहळा म्हणून ओळखला जातो. या समागमात सहभागी होण्यासाठी जळगाव जिल्ह्यातील विविध भागांतून भाविक पानिपतकडे रवाना झाले आहेत. विशेष रेल्वे सुविधेमुळे भाविकांचा प्रवास अधिक सोयीस्कर झाला असून, या व्यवस्थेबद्दल उपस्थितांनी आयोजक आणि संबंधित यंत्रणांचे आभार मानले.
