या कार्यक्रमाला विकास विद्यालयाचे प्राचार्य युवराज पाटील प्रमुख पाहुणे म्हणून उपस्थित होते. विद्यार्थ्यांनी ‘बालविवाह संपवा आणि मुलींच्या हक्कांमध्ये गुंतवणूक करा’ या संकल्पनेवर आधारित नाट्य सादर केले. बालविवाहामुळे मुलींच्या शिक्षणात अडथळे निर्माण होतात, त्यांच्या आरोग्यावर विपरीत परिणाम होऊ शकतात आणि त्यांच्या उज्ज्वल भविष्यासमोर अनेक आव्हाने उभी राहतात, हे विविध प्रसंगांतून प्रभावीपणे दाखविण्यात आले.
मुलींना बालपणापासूनच शिक्षणाची संधी मिळणे, त्यांचे अधिकार सुरक्षित राहणे आणि त्यांना स्वतःच्या पायावर उभे राहण्यासाठी प्रोत्साहन मिळणे आवश्यक आहे, हा संदेश विद्यार्थ्यांनी आपल्या सादरीकरणातून दिला. बालविवाह ही केवळ एका कुटुंबाची समस्या नसून मुलींच्या भविष्याशी आणि सामाजिक विकासाशी निगडित गंभीर बाब आहे. त्यामुळे बालविवाह रोखण्यासाठी समाजात जागरूकता निर्माण करणे आणि मुलींच्या शिक्षणाला प्राधान्य देणे गरजेचे असल्याचे या उपक्रमातून अधोरेखित करण्यात आले.
या जनजागृतीपर कार्यक्रमात जीएनएम द्वितीय वर्षाच्या सर्व ४० विद्यार्थ्यांनी सक्रिय सहभाग नोंदविला. विद्यार्थ्यांनी नाट्याच्या माध्यमातून बालविवाहाचे दुष्परिणाम, मुलींच्या अधिकारांचे महत्त्व आणि शिक्षणातून साधता येणारे सक्षमीकरण याविषयी उपस्थितांमध्ये जागरूकता निर्माण करण्याचा प्रयत्न केला. समाजातील प्रत्येक मुलीला शिक्षण, सुरक्षितता आणि प्रगतीच्या समान संधी मिळाल्या पाहिजेत, अशी भूमिका या उपक्रमातून मांडण्यात आली.
कार्यक्रमाचे सूत्रसंचालन विद्यार्थिनी कुमारी अंजू बुरघाटे यांनी केले, तर कुमारी प्रसन्नता वेले यांनी आभार प्रदर्शन केले. यावेळी डॉ. केतकी पाटील कॉलेज ऑफ नर्सिंगच्या प्रसूती व स्त्रीरोग परिचर्या विभागप्रमुख प्राजक्ता सावरकर, व्याख्यात्या महेश्वरी बोंबळे आणि प्राजक्ता डाखोरे, तसेच ट्यूटर प्रिया खडसे, कीर्ती ढाले आणि सायली देशमुख उपस्थित होत्या.
