पाचोरा-लाईव्ह ट्रेंड्स न्यूज प्रतिनिधी । बँकेतून शेतीकामासाठी काढलेली दोन लाख रुपयांची रोकड आणि जवळील १५ हजार रुपये, अशी एकूण २ लाख १५ हजार रुपयांची रक्कम चोरट्यांनी वृद्ध शेतकऱ्याची दिशाभूल करून लंपास केल्याची घटना पाचोरा शहरातील भडगाव रोडवर ९ ऑक्टोबर रोजी दुपारी सुमारे १.३० वाजता घडली. चोरट्यांनी आधी नोटा खाली टाकून शेतकऱ्याचे लक्ष विचलित केले आणि त्याचवेळी दुचाकीच्या डिक्कीतील पैशांची पिशवी चोरून पळ काढला. या घटनेतील संशयित चोरटे जवळील रुग्णालयाच्या सीसीटीव्ही कॅमेऱ्यात कैद झाले आहेत.
उत्राण (ता. एरंडोल) येथील प्रकाश जिवराम पाटील यांचे पाचोरा शहरातील भडगाव रोडवरील महाराष्ट्र ग्रामीण बँकेत खाते आहे. शेतीसाठी बियाणे खरेदी करणे, शेतमजुरांची मजुरी देणे आणि इतर शेतीकामांचा खर्च भागविण्यासाठी त्यांनी शुक्रवारी, ९ ऑक्टोबर रोजी दुपारी सुमारे एक वाजता बँकेतून दोन लाख रुपये काढले होते. त्यांच्याकडे आधीपासून असलेले १५ हजार रुपयेही त्यांनी या रकमेसोबत ठेवले होते. अशा प्रकारे एकूण २ लाख १५ हजार रुपयांची रोकड त्यांनी एका पिशवीत ठेवली.
बँकेतून बाहेर पडल्यानंतर प्रकाश पाटील यांनी ही पिशवी आपल्या एमएच १९ डीएच ९२३८ क्रमांकाच्या मोपेडच्या डिक्कीमध्ये ठेवण्यास सुरुवात केली. याच वेळी त्यांच्या मागे असलेल्या एका अज्ञात व्यक्तीने आपल्या खिशातील १० आणि २० रुपयांच्या काही नोटा जमिनीवर टाकल्या. त्यानंतर या व्यक्तीने प्रकाश पाटील यांना, ‘तुमचे पैसे खाली पडले आहेत,’ असे सांगून त्यांचे लक्ष विचलित केले.
आपले पैसे पडल्याचे समजून प्रकाश पाटील ते उचलण्यासाठी गेले. याच संधीचा फायदा घेत दुसऱ्या चोरट्याने मोपेडच्या डिक्कीतील २ लाख १५ हजार रुपये असलेली पिशवी काढून घेतली. त्यानंतर दोन्ही चोरटे दुचाकीवरून घटनास्थळावरून पसार झाले. काही क्षणांतच आपली फसवणूक झाल्याचे प्रकाश पाटील यांच्या लक्षात आले; मात्र तोपर्यंत चोरटे दूर निघून गेले होते. घटनेची माहिती मिळताच पाचोरा पोलीस ठाण्याचे पोलीस निरीक्षक राहुलकुमार पवार, पोलीस उपनिरीक्षक कृष्णा घायाळ, जितेंद्र पाटील, पोलीस हेड कॉन्स्टेबल राहुल शिंपी आणि पोलीस कॉन्स्टेबल योगेश पाटील यांनी घटनास्थळी भेट दिली. पोलिसांनी महाराष्ट्र ग्रामीण बँकेलगत असलेल्या श्रेयस हॉस्पिटलमधील सीसीटीव्ही फुटेज तपासले. त्यामध्ये संशयित चोरटे कैद झाल्याची माहिती असून, या फुटेजच्या आधारे पोलिसांकडून त्यांचा शोध घेतला जात आहे.
एकीकडे दुष्काळी परिस्थितीमुळे शेतकरी आर्थिक संकटाचा सामना करत असताना, शेतीकामासाठी जमवलेली कष्टाची कमाई अशा प्रकारे चोरीला गेल्याने शेतकऱ्यांच्या अडचणी वाढल्या आहेत. बँकेतून पैसे काढणाऱ्या नागरिकांना लक्ष्य करून दिशाभूल करण्याच्या पद्धतीने चोरी होण्याच्या घटनांबाबत चिंता व्यक्त केली जात आहे. बँक परिसरातील सुरक्षा वाढविण्यासह अशा प्रकारच्या गुन्ह्यांना आळा घालण्यासाठी पोलिसांनी ठोस उपाययोजना कराव्यात, अशी मागणी नागरिकांकडून होत आहे. दरम्यान, बँकेतून पैसे काढताना किंवा जमा करण्यासाठी जाताना नागरिकांनी सतर्क राहावे, असे आवाहन पोलीस निरीक्षक राहुलकुमार पवार यांनी केले आहे. अनोळखी व्यक्तींकडून होणाऱ्या संभाषणामुळे किंवा पैशांबाबत केल्या जाणाऱ्या बतावणीमुळे आपले लक्ष विचलित होणार नाही, याची काळजी घ्यावी. तसेच, कोणी पाठलाग करत आहे का, याकडे लक्ष ठेवावे आणि संशयास्पद हालचाली आढळल्यास पोलिसांना कळवावे, असेही त्यांनी सांगितले.
