रावेर-लाईव्ह ट्रेंड्स न्यूज प्रतिनिधी । जून महिन्यात झालेल्या जोरदार वादळामुळे केळीपिके, फळबागा, घरे आणि इतर मालमत्तेचे मोठ्या प्रमाणात नुकसान झाल्यानंतरही अद्याप नुकसानभरपाई मिळाली नसल्याने रावेर तालुक्यातील शेतकरी आक्रमक झाले आहेत. नुकसानभरपाई तातडीने मंजूर करून शेतकऱ्यांच्या खात्यावर जमा करावी, तसेच पीकविमा क्षेत्रातील त्रुटी दूर कराव्यात, या मागण्यांसाठी मंगळवार, दि. १५ सप्टेंबर रोजी सकाळी १० वाजता रावेर तहसील कार्यालयासमोर धरणे आंदोलन करण्यात येणार आहे.
रावेर शहरासह संपूर्ण तालुक्यात दि. १, ४ आणि ६ जून रोजी झालेल्या जोरदार वादळाचा शेतकऱ्यांना मोठा फटका बसला होता. या वादळामुळे केळीपिकांचे, विविध फळबागांचे तसेच घरांचे आणि इतर मालमत्तेचे मोठ्या प्रमाणात नुकसान झाले. या नुकसानीची शासनाच्या नियमानुसार तातडीने पंचनामे करण्यात आले होते. मात्र, पंचनामे होऊन सुमारे तीन महिने उलटल्यानंतरही नुकसानभरपाईची रक्कम अद्याप शेतकऱ्यांच्या खात्यावर जमा झालेली नसल्याची तक्रार करण्यात आली आहे. नुकसानग्रस्त शेतकऱ्यांना शासनाकडून मंजूर होणारी भरपाई तातडीने मंजूर करून त्यांच्या बँक खात्यावर जमा करावी, अशी प्रमुख मागणी करण्यात आली आहे. नुकसानभरपाईच्या प्रतीक्षेत असलेल्या शेतकऱ्यांना सध्या आर्थिक अडचणींचा सामना करावा लागत असून, शासनाने याबाबत त्वरित निर्णय घ्यावा, अशी भूमिका शेतकऱ्यांनी घेतली आहे.
दरम्यान, ३१ जुलै रोजी पीकविम्याची मुदत संपल्यानंतरही अद्याप महसूल मंडळे घोषित करण्यात आलेली नसल्याचा मुद्दाही शेतकऱ्यांनी उपस्थित केला आहे. त्यामुळे पीकविमा योजनेतील पात्रता आणि नुकसानभरपाईच्या प्रक्रियेबाबत शेतकऱ्यांमध्ये संभ्रम निर्माण झाला आहे. महसूल मंडळांबाबतची माहिती तातडीने जाहीर करावी, अशी मागणी करण्यात आली आहे. तसेच मंजूर विमाक्षेत्रापैकी सुमारे १४ हजार शेतकऱ्यांचे क्षेत्र कमी दाखविण्यात आल्याचा आरोप करण्यात आला आहे. संबंधित क्षेत्रामध्ये दुरुस्ती करण्याची मागणी करूनही अद्याप सुधारणा करण्यात आलेली नसल्याचे शेतकरी सुनिल कोंडे यांनी निवेदनात नमूद केले आहे. कमी दाखविण्यात आलेले विमाक्षेत्र दुरुस्त करून त्याची अधिकृत माहिती सार्वजनिक करावी, अशी मागणीही त्यांनी केली आहे.
या विविध मागण्यांकडे शासन व प्रशासनाचे लक्ष वेधण्यासाठी शेतकरी सुनिल कोंडे यांनी रावेर तहसील कार्यालयात निवेदन दिले आहे. त्यामध्ये दि. १५ सप्टेंबर रोजी सकाळी १० वाजता तहसील कार्यालयासमोर धरणे आंदोलन करण्याची माहिती देण्यात आली आहे. नुकसानभरपाई आणि पीकविम्याशी संबंधित प्रश्नांचा तातडीने निपटारा करण्याची मागणी या आंदोलनातून करण्यात येणार आहे. या धरणे आंदोलनात तालुकाभरातील जून महिन्यातील वादळामुळे नुकसान झालेले शेतकरी तसेच पीकविमा धारक शेतकऱ्यांनी मोठ्या संख्येने सहभागी व्हावे, असे आवाहन सुनिल कोंडे यांनी केले आहे. शासनाने पंचनामे केले असतानाही भरपाई रखडल्याने शेतकऱ्यांमध्ये नाराजी असून, आंदोलनाच्या माध्यमातून प्रशासनाकडे आपली मागणी ठामपणे मांडण्यात येणार आहे.
