सावदा-लाईव्ह ट्रेंड्स न्यूज प्रतिनिधी । सावदा परिसरातील तांदलवाडी, निंभोरा आणि दसनूर या गावांमध्ये श्री गणरायाचे अत्यंत जल्लोषात आणि उत्साही वातावरणात आगमन झाले. गणेशोत्सवाच्या पहिल्या दिवशी या तिन्ही गावांमध्ये आयोजित करण्यात आलेल्या आगमनाच्या विविध सोहळ्यांना नवनिर्वाचित विधान परिषद आमदार नंदकिशोर महाजन यांनी विशेष उपस्थिती लावली. त्यांनी विविध गणेश मंडळांच्या श्रींच्या मूर्तीचे दर्शन घेऊन मनोभावे आरती केली व संपूर्ण परिसर ‘गणपती बाप्पा मोरया’च्या जयघोषाने दुमदुमून गेला.
गणरायाच्या आगमनामुळे तांदलवाडी, निंभोरा व दसनूर येथे भक्तिमय, चैतन्यमयी आणि उत्साहाचे वातावरण निर्माण झाले होते. ढोल-ताशांचा गजर, पारंपरिक वाद्यांची जुगलबंदी आणि गुलालाची उधळण करत गावकर्यांनी लाडक्या बाप्पाचे स्वागत केले. या सोहळ्यांदरम्यान आमदार नंदकिशोर महाजन यांनी स्थानिक गणेश मंडळांचे पदाधिकारी, कार्यकर्ते आणि उपस्थित ग्रामस्थांशी आपुलकीने संवाद साधला. श्री गणरायाच्या असीम कृपेने प्रत्येक नागरिकाच्या जीवनात सुख, समृद्धी, उत्तम आरोग्य व समाधान नांदावे, अशी प्रार्थना महाजन यांनी आरतीप्रसंगी केली.
या आगमन सोहळ्यांना तिन्ही गावांतील सार्वजनिक गणेश मंडळांचे सर्व पदाधिकारी, बालचमू, युवक, महिला आणि ज्येष्ठ नागरिक मोठ्या संख्येने उपस्थित होते. उत्सवाच्या या पवित्र काळात गणेशोत्सवाच्या माध्यमातून समाजात ऐक्य, बंधुभाव, सामाजिक एकोपा आणि सकारात्मक विचारांची जपणूक व्हावी, अशी भावना या प्रसंगी आमदार महाजन आणि ग्रामस्थांनी व्यक्त केली. लोकप्रतिनिधींच्या या सहभागामुळे मंडळांच्या कार्यकर्त्यांमध्ये अधिकच उत्साह पाहायला मिळाला.
