जळगाव-लाईव्ह ट्रेंड्स न्यूज प्रतिनिधी । जळगाव शहर जिल्हा काँग्रेस कमिटीच्या नव्याने नियुक्त करण्यात आलेल्या पदाधिकाऱ्यांना नियुक्तीपत्र प्रदान करून त्यांचा सत्कार करण्याचा कार्यक्रम रविवार, 13 सप्टेंबर 2026 रोजी आयोजित करण्यात आला आहे. सकाळी 10.30 वाजता काँग्रेस भवन येथे हा कार्यक्रम होणार असून, यावेळी पक्षाच्या पदाधिकाऱ्यांसह कार्यकर्त्यांची मोठी उपस्थिती राहणार आहे.
जळगाव शहर जिल्हा काँग्रेस कमिटीच्या संघटनात्मक बांधणीला अधिक बळकटी देण्यासाठी नव्या पदाधिकाऱ्यांची नियुक्ती करण्यात आली आहे. या नवनियुक्त पदाधिकाऱ्यांना कार्यक्रमात अधिकृत नियुक्तीपत्र देण्यात येणार असून, त्यांचा सत्कारही करण्यात येणार आहे. आगामी काळात पक्षाची ध्येयधोरणे तळागाळापर्यंत पोहोचविण्यासह संघटना मजबूत करण्याची जबाबदारी या पदाधिकाऱ्यांवर राहणार आहे.
या कार्यक्रमाच्या अध्यक्षस्थानी आमदार शिरीषदादा चौधरी राहणार आहेत. प्रमुख पाहुणे म्हणून जळगाव जिल्हा काँग्रेस कमिटीचे प्रभारी डॉ. अरविंद कोलते, महाराष्ट्र प्रदेश काँग्रेस कमिटीचे उपाध्यक्ष संदीप पाटील, महाराष्ट्र प्रदेश काँग्रेस कमिटीचे सरचिटणीस मुक्ती हरून, जळगाव महानगरपालिकेचे माजी उपमहापौर करीम सालार, रावेर पूर्व जळगाव जिल्हा काँग्रेस कमिटीचे जिल्हाध्यक्ष धनंजय चौधरी यांची उपस्थिती राहणार आहे.
तसेच जळगाव जिल्हा काँग्रेस कमिटीचे माजी जिल्हाध्यक्ष बाळासाहेब प्रदीप पवार, माजी जिल्हाध्यक्ष उदयसिंग पाटील, माजी शहराध्यक्ष डॉ. ए. जी. भंगाळे आणि महाराष्ट्र प्रदेश काँग्रेस कमिटीच्या सचिव डॉ. ईश्वरी राठोड यांच्यासह काँग्रेसचे पदाधिकारी व कार्यकर्ते उपस्थित राहणार आहेत.
नवनियुक्त पदाधिकाऱ्यांच्या नियुक्तीमुळे जळगाव शहरातील काँग्रेस संघटनेला नव्या उमेदीने काम करण्याची संधी मिळणार असून, पक्षाच्या विविध उपक्रमांना आणि संघटनात्मक कार्याला अधिक गती देण्याचा प्रयत्न केला जाणार आहे. नियुक्तीपत्र प्रदान कार्यक्रमाच्या माध्यमातून नव्या पदाधिकाऱ्यांचा उत्साह वाढविण्यासोबतच पक्षातील कार्यकर्त्यांमध्ये संघटनात्मक समन्वय मजबूत करण्यावर भर दिला जाणार आहे.
दरम्यान, या कार्यक्रमाला जळगाव शहर जिल्हा काँग्रेस कमिटीच्या सर्व पदाधिकारी व कार्यकर्त्यांनी मोठ्या संख्येने उपस्थित राहावे, असे आवाहन शहर जिल्हाध्यक्ष जमील शेख यांनी केले आहे.
