यावल-लाईव्ह ट्रेंड्स न्यूज प्रतिनिधी । रावेर-यावल विधानसभा मतदारसंघासह परिसरात पावसाचे प्रमाण अत्यल्प आणि अनियमित राहिल्याने दुष्काळसदृश परिस्थिती निर्माण झाली आहे. पावसाअभावी शेतकऱ्यांची उभी पिके संकटात सापडली असून ती वाचविण्यासाठी शासनाने तातडीने ‘कृत्रिम पाऊस’ (Cloud Seeding) पाडण्याच्या शक्यतेचा अभ्यास करून आवश्यक उपाययोजना कराव्यात, अशी मागणी आमदार अमोल हरिभाऊ जावळे यांनी मुख्यमंत्री देवेंद्र फडणवीस यांच्याकडे केली आहे.
यंदा रावेर आणि यावल तालुक्यासह लगतच्या परिसरात अपेक्षित वेळेत आणि पुरेशा प्रमाणात पाऊस झालेला नाही. पावसाच्या अनियमिततेचा थेट परिणाम शेतीवर झाला असून केळी, कापूस, मका, सोयाबीन यांसह विविध पिकांच्या वाढीवर विपरीत परिणाम होत आहे. काही भागांमध्ये पाण्याअभावी उभी पिके वाळण्याच्या मार्गावर असल्याने शेतकऱ्यांमध्ये चिंतेचे वातावरण आहे.
पिकांना आवश्यक त्या वेळी पाणी उपलब्ध न झाल्याने उत्पादनात मोठी घट होण्याची शक्यता आहे. आधीच शेतीच्या वाढत्या खर्चामुळे अडचणीत असलेल्या शेतकऱ्यांना उत्पादन घटल्यास मोठा आर्थिक फटका बसू शकतो. त्यामुळे पिके वाचविण्यासाठी उपलब्ध असलेल्या सर्व पर्यायांचा शासनाने तातडीने विचार करणे गरजेचे असल्याचे आमदार जावळे यांनी म्हटले आहे.
पावसाअभावी केवळ पिकांचाच प्रश्न निर्माण झाला नसून भूजल पातळीवरही त्याचा परिणाम होण्याची शक्यता आहे. भूजल पातळी खालावल्यास आगामी काळात पिण्याच्या पाण्याचा तसेच जनावरांच्या चाऱ्याचा प्रश्न अधिक गंभीर होऊ शकतो. त्यामुळे परिस्थितीचे गांभीर्य लक्षात घेऊन प्रशासनाने वेळीच उपाययोजना करण्याची गरज व्यक्त होत आहे.
या पार्श्वभूमीवर रावेर-यावल विधानसभा मतदारसंघासह लगतच्या परिसरात कृत्रिम पाऊस पाडण्याची तांत्रिकदृष्ट्या शक्यता तपासण्यात यावी, अशी मागणी आमदार अमोल जावळे यांनी केली आहे. संबंधित तज्ज्ञ आणि विभागांच्या माध्यमातून ढगांची उपलब्धता, हवामानाची परिस्थिती आणि अन्य तांत्रिक बाबींचा अभ्यास करून आवश्यक प्रशासकीय प्रक्रिया तातडीने सुरू करण्याची मागणी त्यांनी मुख्यमंत्र्यांकडे केली आहे.
शासनाने या मागणीची गांभीर्याने दखल घेऊन संबंधित विभागांना आवश्यक निर्देश द्यावेत, अशी अपेक्षा आमदार जावळे यांनी व्यक्त केली आहे. पावसाअभावी संकटात सापडलेल्या शेतकऱ्यांना दिलासा देण्यासाठी शासनाने तातडीने पावले उचलल्यास उभी पिके वाचविण्यास काही प्रमाणात मदत होऊ शकते, अशी भूमिका त्यांनी मांडली आहे.
