अमळनेर-लाईव्ह ट्रेंड्स न्यूज प्रतिनिधी । खानदेशातील लोकजीवनाशी अतूट नाते असलेल्या कानबाई मातेच्या उत्सवाने अमळनेर शहरात भक्ती, परंपरा आणि उत्साहाचे वातावरण निर्माण झाले आहे. शहरातील विविध भागांत कानबाई मातेची स्थापना व पूजन केल्यानंतर भव्य मिरवणुका काढण्यात आल्या. पारंपरिक वाद्यांचा गजर, मातेचा जयघोष, महिलांची फुगडी, तरुणाईचे नृत्य आणि पाण्याच्या फवाऱ्यांनी पैलाड परिसर अक्षरशः दुमदुमून गेला.
पैलाड परिसरात महंत हरिहरानंद गिरि (दादू महाराज भगत) यांच्या निवासस्थानी कानबाई मातेची भक्तिमय वातावरणात स्थापना करण्यात आली. पूजनानंतर मातेची भव्य मिरवणूक वाजतगाजत काढण्यात आली. या मिरवणुकीत महिला, पुरुष, तरुणाई, भाविक आणि नागरिक मोठ्या संख्येने सहभागी झाले होते. महिलांनी पारंपरिक पद्धतीने फुगडी खेळत उत्सवाचा आनंद घेतला, तर तरुणाईने नृत्य करत जल्लोष केला. भाविकांच्या ‘कानबाई मातेचा जयघोष’ने संपूर्ण परिसर भक्तिमय झाला.
मिरवणुकीदरम्यान ठिकठिकाणी पाण्याचे फवारे उडवत जल्लोष करण्यात आला. त्यामुळे उत्सवाला आणखी रंगत आली. पैलाडच्या मुख्य चौकात शहरातील विविध भागांतून निघालेल्या कानबाई-रानबाईच्या मिरवणुका एकमेकींना भेटल्या. या पारंपरिक भेटीच्या वेळी भाविकांनी मोठ्या उत्साहात जयघोष करत आनंद साजरा केला. विविध मिरवणुका एकत्र आल्याने भक्ती, उत्साह आणि खानदेशी लोकपरंपरेचा अनोखा संगम अनुभवायला मिळाला.
या मिरवणुकीत दादू महाराज भगत यांचे गुरुवर्य १००८ महामंडलेश्वर पार्वती आई परशुराम जोगी नंदगिरीजी, आंतरराष्ट्रीय किन्नर आखाड्याच्या उपाध्यक्षा, धुळे यांचीही उपस्थिती होती. त्यांच्या उपस्थितीमुळे धार्मिक वातावरणाला अधिक आध्यात्मिक रंग प्राप्त झाला. यावेळी अनेक भाविक, नागरिक, मित्रपरिवार आणि मान्यवरांनी दादू महाराज भगत यांची भेट घेत कानबाई माता उत्सवानिमित्त शुभेच्छा दिल्या.
यावेळी जयनिल फाउंडेशनचे अध्यक्ष गौतम अनिल पाटील, जितेंद्र ठाकूर, दुर्गेश पाटील, भूषण लोहार, गणेश पाटील, चेतन पाटील, दर्शन पाटील, मोहित शिंदे, कुशल पाटील यांच्यासह अनेक मान्यवर, भाविक आणि नागरिक मोठ्या संख्येने उपस्थित होते.
दरम्यान, शनीपेठ परिसरातील चोपडा नाका येथेही ‘श्रावणीय कानबाई माता उत्सव’ मोठ्या भक्तिभावात साजरा करण्यात आला. उत्सवानिमित्त रोट पूजन, भाजी-भाकरीचा नैवेद्य, गहू दळणे, मातेचा अभिषेक, नैवेद्य, महाआरती तसेच जागरणाचे आयोजन करण्यात आले होते. उत्सवाच्या सांगतेनिमित्त कानबाई मातेची भव्य विसर्जन मिरवणूक काढण्यात आली. या मिरवणुकीतही भाविकांनी मोठ्या संख्येने सहभागी होत मातेचा जयघोष केला.
कानबाई मातेचा उत्सव हा जळगाव, धुळे आणि नंदुरबारसह संपूर्ण खानदेशच्या लोकजीवनाशी जोडलेला महत्त्वपूर्ण पारंपरिक उत्सव आहे. अनेक पिढ्यांची परंपरा लाभलेल्या या उत्सवाच्या निमित्ताने घराघरात नातेवाईक, आप्तेष्ट आणि माहेरवाशिणी एकत्र येतात. कानबाई मातेला सुख-समृद्धी, सौख्य, शांती आणि कुटुंबाच्या कल्याणाचे प्रतीक मानले जाते.
विशेषतः महिलांचा उत्स्फूर्त सहभाग, पारंपरिक गीते, फुगडी, नृत्य आणि सामूहिक उत्सव हे कानबाई उत्सवाचे वैशिष्ट्य आहे. कानबाई-रानबाईच्या मिरवणुकांची परस्पर भेट ही या लोकपरंपरेतील विशेष बाब असून, त्यातून सामाजिक एकोपा आणि नात्यांची वीण अधिक घट्ट होत असल्याचे पाहायला मिळते.
अमळनेर शहरातील विविध भागांत झालेल्या कानबाई मातेच्या स्थापना, पूजन आणि मिरवणुकांमुळे श्रद्धा, परंपरा आणि उत्साहाचा सुंदर संगम अनुभवायला मिळाला. भाविकांच्या उत्स्फूर्त सहभागामुळे संपूर्ण अमळनेर शहर कानबाई मातेच्या जयघोषाने दुमदुमून गेले.
