जळगाव-लाईव्ह ट्रेंड्स न्यूज प्रतिनिधी । छातीत अचानक तीव्र वेदना, घाम आणि अस्वस्थता जाणवू लागल्यानंतर गंभीर अवस्थेत रुग्णालयात दाखल झालेल्या ६५ वर्षीय रुग्णाचे प्राण वेळेवर करण्यात आलेल्या ‘पामी’ शस्त्रक्रियेमुळे वाचविण्यात डॉ. उल्हास पाटील वैद्यकीय महाविद्यालय व रुग्णालयातील हृदयविकार तज्ज्ञांना यश आले. तपासणीत हृदयाला रक्तपुरवठा करणारी प्रमुख कोरोनरी रक्तवाहिनी १०० टक्के बंद असल्याचे आढळून आले होते. तातडीने उपचार करत रक्तवाहिनीतील अडथळा दूर करून रक्तप्रवाह पूर्ववत करण्यात आल्याने रुग्णाच्या प्रकृतीत सुधारणा झाली आहे.
यावल तालुक्यातील सुभाष नामक ६५ वर्षीय रुग्णाला अचानक छातीत तीव्र दुखणे, घाम येणे आणि अस्वस्थता जाणवू लागली. परिस्थितीचे गांभीर्य लक्षात घेऊन नातेवाईकांनी त्यांना तातडीने डॉ. उल्हास पाटील वैद्यकीय महाविद्यालय व रुग्णालयात दाखल केले. रुग्णालयाच्या आपत्कालीन विभागाने विलंब न करता प्राथमिक उपचार सुरू केले.
हृदयालयाचे प्रमुख डॉ. वैभव पाटील यांच्या मार्गदर्शनाखाली हृदयविकार तज्ज्ञ डॉ. अदनान अली आणि डॉ. झिशान यांना तातडीने पाचारण करण्यात आले. रुग्णाची प्रकृती गंभीर असल्याने डॉक्टरांनी ईसीजी, रक्त तपासण्या आणि आवश्यक वैद्यकीय चाचण्या केल्या. तपासणीच्या अहवालातून रुग्णाला तीव्र हृदयविकाराचा झटका आल्याचे निदान झाले.
यानंतर करण्यात आलेल्या अँजिओग्राफीमध्ये हृदयाला रक्तपुरवठा करणारी एक महत्त्वाची कोरोनरी रक्तवाहिनी तब्बल **१०० टक्के ब्लॉक** झाल्याचे स्पष्ट झाले. रक्तवाहिनी पूर्णपणे बंद असल्याने उपचाराला विलंब झाल्यास हृदयाच्या स्नायूंना गंभीर व कायमस्वरूपी नुकसान होण्याची तसेच रुग्णाच्या जीवाला धोका निर्माण होण्याची शक्यता होती.
परिस्थितीचे गांभीर्य लक्षात घेऊन डॉक्टरांनी तातडीने ‘पामी’ शस्त्रक्रिया करण्याचा निर्णय घेतला. हृदयविकार तज्ज्ञ डॉ. अदनान अली आणि डॉ. झिशान यांनी अनुभवी वैद्यकीय पथकाच्या सहकार्याने अत्याधुनिक कॅथलॅबमध्ये ही प्रक्रिया यशस्वीरीत्या पार पाडली. शस्त्रक्रियेदरम्यान बंद झालेल्या रक्तवाहिनीतील अडथळा दूर करण्यात आला आणि आवश्यकतेनुसार स्टेंट बसवून रक्तप्रवाह सुरळीत करण्यात आला.
शस्त्रक्रियेनंतर रुग्णाच्या प्रकृतीत लक्षणीय सुधारणा झाली. छातीतील वेदना कमी झाल्या असून सध्या रुग्णाची प्रकृती स्थिर असल्याचे रुग्णालयाकडून सांगण्यात आले. पुढील वैद्यकीय सल्ल्यानुसार त्यांच्यावर उपचार आणि निरीक्षण सुरू आहे.
याबाबत डॉ. अदनान अली यांनी सांगितले की, हृदयविकाराच्या झटक्याच्या रुग्णांसाठी प्रत्येक मिनिट अत्यंत महत्त्वाचा असतो. रक्तवाहिनी पूर्णपणे बंद झाल्यानंतर उपचार जितक्या लवकर मिळतात, तितके हृदयाच्या स्नायूंचे नुकसान कमी करता येते. संबंधित रुग्णाला वेळेत रुग्णालयात आणण्यात आले आणि तातडीने ‘पामी’ शस्त्रक्रिया करण्यात आल्याने त्यांचे प्राण वाचविणे शक्य झाले.
छातीत दुखणे, श्वास घेण्यास त्रास होणे, अचानक घाम येणे, अस्वस्थता किंवा डाव्या हातात वेदना जाणवणे यांसारखी लक्षणे आढळल्यास नागरिकांनी त्याकडे दुर्लक्ष न करता तातडीने वैद्यकीय मदत घ्यावी, असे आवाहन डॉ. अदनान अली यांनी केले आहे.
