पारोळा-लाईव्ह ट्रेंड्स न्यूज प्रतिनिधी । काल रात्रीपासून सुरू असलेल्या अतिमुसळधार पावसाने जळगाव जिल्ह्यातील अनेक भागांत जनजीवन विस्कळीत झाले असून पारोळा तालुक्यातील परिस्थितीही गंभीर बनली आहे. मुसळधार पावसामुळे नदी-नाले दुथडी भरून वाहत असून अनेक गावांमध्ये पावसाचे व पुराचे पाणी शिरले आहे. त्यामुळे नागरिकांच्या दैनंदिन जीवनावर मोठा परिणाम झाला असून शेतकऱ्यांच्या उभ्या पिकांसह संसारोपयोगी साहित्य, पशुधन आणि शेतीचे मोठ्या प्रमाणावर नुकसान झाल्याचे चित्र आहे.
पूरपरिस्थितीची गंभीरता लक्षात घेऊन आमदार अमोल पाटील यांनी जिल्हाधिकारी रोहन घुगे यांच्या समवेत पारोळा तालुक्यातील मुंदाणे प्र.उ., देवगाव, टोळी, तरडी आणि उंदीरखेडे या पूरग्रस्त गावांना भेट देत प्रत्यक्ष परिस्थितीची पाहणी केली. यावेळी गावांमध्ये शिरलेले पाणी, रस्त्यांची झालेली दुरवस्था, शेतीमध्ये साचलेले पाणी आणि नागरिकांना भेडसावणाऱ्या अडचणींचा त्यांनी आढावा घेतला.
अनेक कुटुंबांच्या घरांमध्ये पाणी शिरल्याने संसारोपयोगी वस्तूंचे मोठे नुकसान झाले आहे. तर शेतांमध्ये पाणी साचल्याने वर्षभराच्या मेहनतीने उभी केलेली पिके धोक्यात आली आहेत. काही ठिकाणी पिके पाण्याखाली गेल्याने शेतकऱ्यांचे मोठे आर्थिक नुकसान होण्याची भीती व्यक्त होत आहे. पशुधनाच्या सुरक्षिततेचाही प्रश्न निर्माण झाला असून प्रशासनाकडून मदतकार्याला वेग देण्याची गरज निर्माण झाली आहे.
पाहणीदरम्यान आमदार अमोल पाटील यांनी संबंधित प्रशासनाला पूरग्रस्त भागातील मदतकार्य अधिक गतिमान करण्याच्या सूचना दिल्या. गरज भासल्यास नागरिकांना तातडीने सुरक्षितस्थळी हलवावे, तसेच अन्नधान्य, पिण्याचे पाणी, औषधे आणि इतर जीवनावश्यक सुविधा उपलब्ध करून द्याव्यात, असे निर्देश देण्यात आले. पशुधनासाठीही आवश्यक त्या सुविधा आणि सुरक्षिततेची व्यवस्था करण्यावर भर देण्यात आला.
पुरामुळे झालेल्या शेती, घरगुती साहित्य आणि इतर नुकसानीचे पंचनामे तातडीने पूर्ण करून त्याची नोंद शासनाकडे पाठविण्याच्या सूचनाही देण्यात आल्या. शासनाकडून मिळणारी मदत पात्र लाभार्थ्यांपर्यंत कोणत्याही विलंबाशिवाय पोहोचावी, यासाठी सातत्याने पाठपुरावा केला जाईल, असे आमदार अमोल पाटील यांनी स्पष्ट केले.
दरम्यान, पुढील काही दिवस मुसळधार ते अतिमुसळधार पावसाचा अंदाज असल्याने नागरिकांनी विशेष खबरदारी घेण्याचे आवाहन करण्यात आले आहे. कोणत्याही प्रकारच्या अफवांवर विश्वास न ठेवता प्रशासनाच्या सूचनांचे पालन करावे, अत्यावश्यक कारणाशिवाय घराबाहेर पडू नये, तसेच नदी, नाले, पूल आणि वेगाने वाहणाऱ्या पाण्याच्या प्रवाहाजवळ जाणे टाळावे, असे प्रशासनाकडून सांगण्यात आले.
या संकटाच्या काळात पूरग्रस्तांच्या पाठीशी ठामपणे उभे असल्याचा विश्वास व्यक्त करताना आमदार अमोल पाटील म्हणाले, “पूरग्रस्तांच्या वेदना शब्दांत मावणाऱ्या नाहीत. प्रशासन आणि नागरिकांच्या प्रत्येक अडचणीत मी खंबीरपणे त्यांच्या पाठीशी उभा आहे. या नैसर्गिक आपत्तीवर संयम, धैर्य आणि परस्पर सहकार्याच्या बळावर आपण निश्चित मात करू.”
या पाहणीवेळी जिल्हा परिषद कृषी सभापती डॉ. दिनकर पाटील, तहसीलदार डॉ. उल्हास देवरे, पोलीस निरीक्षक दीपक पवार, तालुकाप्रमुख मधुकर पाटील, संबंधित ग्रामपंचायत अधिकारी, तलाठी, स्थानिक लोकप्रतिनिधी तसेच ग्रामस्थ मोठ्या संख्येने उपस्थित होते. प्रशासन आणि लोकप्रतिनिधींच्या संयुक्त पाहणीमुळे पूरग्रस्त भागातील प्रत्यक्ष परिस्थिती अधिक स्पष्ट झाली असून नुकसानग्रस्तांना तातडीने मदत मिळण्याची अपेक्षा व्यक्त होत आहे. पारोळा तालुक्यातील अतिमुसळधार पावसाने अनेक गावांमध्ये पूरस्थिती निर्माण केली असून शेती, घरे आणि जनजीवनावर त्याचा मोठा परिणाम झाला आहे. आमदार अमोल पाटील आणि जिल्हाधिकारी रोहन घुगे यांनी परिस्थितीची पाहणी करून मदतकार्य, पंचनामे आणि नागरिकांच्या सुरक्षिततेसाठी प्रशासनाला आवश्यक सूचना दिल्या आहेत.
