अमळनेर-लाईव्ह ट्रेंड्स न्यूज प्रतिनिधी । शहर व परिसरातील कायदा-सुव्यवस्था अधिक बळकट करण्यासाठी अमळनेर पोलिसांनी व्यापक म्बिंग ऑपरेशन राबवून विविध प्रकारच्या गुन्ह्यांवर आणि नियमभंग करणाऱ्यांवर मोठ्या प्रमाणात कारवाई केली. या मोहिमेत पिस्तूल व तलवारीसह शस्त्र कायद्यांतर्गत कारवाई, दारूबंदी व जुगार प्रकरणे, सार्वजनिक ठिकाणी मद्यपान, वाहतूक नियमभंग, मद्यधुंद वाहनचालकांवर कारवाई, तसेच फरार व वॉरंटधारकांचा शोध घेण्यात आला. पोलिसांच्या या धडक कारवाईमुळे गुन्हेगारी प्रवृत्तीला आळा घालण्याचा प्रयत्न करण्यात आला आहे.
या कोम्बिंग ऑपरेशनसाठी अमळनेर उपविभागीय पोलीस अधिकारी यांच्या नेतृत्वाखाली मोठा पोलीस बंदोबस्त तैनात करण्यात आला होता. अमळनेर पोलीस ठाण्याकडील १ उपविभागीय पोलीस अधिकारी, ७ अधिकारी आणि ६२ अंमलदार, तर स्थानिक गुन्हे शाखा, जळगावकडील १ अधिकारी आणि १० अंमलदार अशा मोठ्या पोलीस पथकाने या मोहिमेत सहभाग घेतला.
ऑपरेशनदरम्यान आर्म्स ॲक्टअंतर्गत दोन स्वतंत्र कारवाया करण्यात आल्या. कलम ३/२५ अंतर्गत एका पिस्तूलप्रकरणी, तर कलम ४/२५ अंतर्गत एका तलवारप्रकरणी कारवाई करण्यात आली. या कारवायांमुळे बेकायदेशीर शस्त्र बाळगणाऱ्यांवर पोलिसांनी कठोर भूमिका घेतल्याचे स्पष्ट झाले आहे.
दारूबंदी कायद्यांतर्गत ९ कारवाया करण्यात आल्या, तर जुगार कायद्यांतर्गत ५ प्रकरणे नोंदविण्यात आली. सार्वजनिक ठिकाणी मद्यपान करणाऱ्या ३२ व्यक्तींविरुद्ध महाराष्ट्र पोलीस कायद्यातील कलम ११२/११७ अन्वये कारवाई करण्यात आली. तसेच कोटपा कायद्यांतर्गत ३ प्रकरणे दाखल करण्यात आली आहेत. पोलिसांनी दोन किंवा त्यापेक्षा अधिक गुन्हे दाखल असलेल्या तब्बल ११३ व्यक्तींना तपासणीसाठी पोलीस ठाण्यात आणले. याशिवाय २५ हिस्ट्रीशीटरची तपासणी करण्यात आली. या कारवाईमुळे पूर्वीपासून गुन्हेगारी पार्श्वभूमी असलेल्या व्यक्तींवर पोलिसांनी विशेष लक्ष केंद्रित केल्याचे दिसून आले.
वाहतूक नियमांचे उल्लंघन करणाऱ्यांवरही कारवाई करण्यात आली. मोटार वाहन कायद्यांतर्गत ३६ प्रकरणे दाखल करण्यात आली असून, एमव्ही ॲक्ट कलम ६६/१९२ अंतर्गत एका प्रकरणात कारवाई करण्यात आली. मद्यपान करून वाहन चालविणाऱ्या ३ चालकांवर ‘ड्रंक अँड ड्राईव्ह’ अंतर्गत कारवाई करण्यात आली. तसेच दुचाकींच्या सायलेन्सरमध्ये बनावट बदल करून मोठा आवाज करणाऱ्यांविरोधात २ प्रकरणे नोंदविण्यात आली.
या मोहिमेदरम्यान बेपत्ता महिलांचा शोध घेण्यासाठीही पोलिसांनी प्रयत्न केले असून ६ महिलांचा शोध लावण्यात आला. न्यायालयीन प्रक्रियेशी संबंधित कारवाईमध्ये १५ अजामीनपात्र वॉरंट (NBW), ६ जामीनपात्र वॉरंट (BW) आणि २१ समन्सची अंमलबजावणी करण्यात आली. तसेच शहरातील १६ हॉटेल आणि लॉजची तपासणी करण्यात आली. सार्वजनिक ठिकाणी अडथळा किंवा अनुचित प्रकाराला प्रतिबंध करण्याच्या उद्देशाने BNS कलम २८५ अंतर्गत ७ प्रकरणांमध्ये कारवाई करण्यात आली. याशिवाय BNS कलम १२६/१२९ अंतर्गत २० आरोपींवर प्रतिबंधात्मक स्वरूपाची कारवाई करण्यात येत असल्याची माहिती पोलिसांकडून देण्यात आली आहे.
अमळनेर पोलिसांच्या या व्यापक कोम्बिंग ऑपरेशनमध्ये गुन्हेगारी पार्श्वभूमी असलेल्या व्यक्तींची तपासणी, शस्त्र बाळगणाऱ्यांवर कारवाई, अवैध दारू-जुगाराविरोधात धडक मोहीम, वाहतूक नियमांचे उल्लंघन करणाऱ्यांवर दंडात्मक कारवाई तसेच वॉरंटची अंमलबजावणी अशा विविध आघाड्यांवर एकाचवेळी कारवाई करण्यात आली. त्यामुळे शहरातील कायदा व सुव्यवस्था अबाधित ठेवण्यासाठी पोलिसांकडून विशेष मोहीम सातत्याने राबविली जाण्याची शक्यता आहे.
