मुक्ताईनगर-लाईव्ह ट्रेंड्स न्यूज प्रतिनिधी । शहरातील शिवसृष्टीजवळील भाजी मंडी परिसरात महावितरणच्या कामकाजावर पुन्हा एकदा प्रश्नचिन्ह निर्माण करणारी घटना घडली आहे. अपघातामुळे वाकलेल्या जुन्या वीज खांबाच्या जागी नुकताच उभारण्यात आलेला नवीन वीज खांब अवघ्या चार ते पाच दिवसांतच तिरका झाल्याने नागरिकांमध्ये संतापाची लाट उसळली आहे. या प्रकारामुळे कामाच्या गुणवत्तेसह देखरेखीच्या प्रक्रियेवरही गंभीर प्रश्न उपस्थित होत आहेत.
काही दिवसांपूर्वी अपघातामुळे जुना वीज खांब नुकसानग्रस्त झाल्यानंतर महावितरणकडून नवीन खांब उभारण्यात आला होता. मात्र, अवघ्या चार-पाच दिवसांतच हा खांब तिरका झाल्याचे समोर आल्याने नागरिकांनी संबंधित कामाच्या दर्जावर तीव्र नाराजी व्यक्त केली आहे. सार्वजनिक सुरक्षेशी थेट संबंधित असलेल्या अशा कामात निष्काळजीपणा झाल्याचा आरोप स्थानिकांकडून केला जात आहे. सुदैवाने या खांबावर उच्चदाब किंवा वीजवाहक तारा नसून केवळ केबल जोडण्यात आलेली असल्याने मोठी दुर्घटना टळली. मात्र, भविष्यात या ठिकाणी वीजवाहक तारा जोडण्यात आल्यास गंभीर अपघात होण्याची शक्यता नाकारता येत नाही. त्यामुळे हा खांब तातडीने सुरक्षित करून आवश्यक दुरुस्ती करण्यात यावी, अशी मागणी नागरिकांनी केली आहे.
घटनेनंतर परिसरातील नागरिकांनी महावितरणच्या कामाच्या गुणवत्तेबाबत तीव्र नाराजी व्यक्त केली. “करदात्यांच्या पैशातून करण्यात येणारी कामे इतक्या निकृष्ट दर्जाची का केली जातात? अवघ्या चार दिवसांत नवीन खांब तिरका होणे म्हणजे नेमकी जबाबदारी कोणाची?” असा संतप्त सवाल नागरिकांनी उपस्थित केला आहे.
स्थानिकांनी या संपूर्ण प्रकरणाची उच्चस्तरीय चौकशी करून संबंधित ठेकेदार आणि जबाबदार अधिकाऱ्यांवर कठोर कारवाई करण्याची मागणी केली आहे. तसेच तिरका झालेला वीज खांब त्वरित बदलून परिसरातील नागरिकांच्या सुरक्षिततेची हमी द्यावी, अन्यथा भविष्यात घडणाऱ्या कोणत्याही दुर्घटनेसाठी महावितरण प्रशासनालाच जबाबदार धरले जाईल, असा इशाराही नागरिकांनी दिला आहे. सार्वजनिक सुरक्षेच्या दृष्टीने वीज वितरण यंत्रणेची कामे दर्जेदार आणि सुरक्षित असणे अत्यावश्यक आहे. मात्र, मुक्ताईनगरातील या घटनेमुळे महावितरणच्या कामाच्या गुणवत्तेवर पुन्हा प्रश्नचिन्ह निर्माण झाले असून, प्रशासनाने याची गंभीर दखल घेऊन तातडीने उपाययोजना करण्याची गरज व्यक्त होत आहे.
