यावल-लाईव्ह ट्रेंड्स न्यूज प्रतिनिधी । आषाढी एकादशीच्या पावन पर्वावर पंढरपूर येथे श्री विठ्ठलाच्या दर्शनासाठी जाणाऱ्या वारकरी आणि भाविकांच्या सोयीसाठी यावल ए.टी. आगाराने एक महत्त्वपूर्ण पाऊल उचलले आहे. ‘गाव तिथे एसटी’ या विशेष उपक्रमांतर्गत ‘वारकरी तिथे लालपरी, सेवा तिथे’ ही संकल्पना राबविण्यात येत असून, तालुक्यातील जास्तीत जास्त भाविकांनी या सुवर्णसंधीचा लाभ घ्यावा, असे आवाहन यावल एसटी आगाराचे व्यवस्थापक दिलीप महाजन यांनी केले आहे.
महाराष्ट्राची आध्यात्मिक आणि सांस्कृतिक परंपरा असलेली पंढरीची वारी ही सुमारे ७०० ते ८०० वर्षांहून अधिक जुनी आहे. या महान परंपरेची सुरुवात संत ज्ञानेश्वरांचे वडील विठ्ठलपंत यांच्या काळापासून म्हणजेच १३ व्या शतकात झाली. त्यानंतर संत नामदेवांनी या परंपरेला लोकचळवळीचे व्यापक स्वरूप दिले. तेव्हापासून दरवर्षी आषाढी एकादशीला वारकरी संप्रदायाचे आराध्य दैवत असलेल्या विठ्ठलाच्या दर्शनासाठी लाखो भाविक भक्तीभावाने पंढरपुरात दाखल होतात. यावर्षी देखील यावल तालुक्यातील भाविकांना पंढरपूरचा प्रवास सुकर आणि सुटसुटीत व्हावा यासाठी आगार प्रशासनाने चोख नियोजन केले आहे.
या योजनेअंतर्गत यावल तालुक्यातील ज्या गावातून पंढरपूर यात्रेसाठी जाणाऱ्या भाविकांची संख्या किमान ४० इतकी असेल, त्या गावासाठी आगारामार्फत स्वतंत्र आणि थेट एसटी बस गाडीची व्यवस्था केली जाणार आहे. यामुळे ग्रामीण भागातील वृद्ध आणि महिला भाविकांना मुख्य बसस्थानकापर्यंत येण्याचा त्रास वाचणार असून, त्यांना आपापल्या गावातूनच थेट विठ्ठल चरणी जाणे शक्य होणार आहे.
पंढरपूर यात्रेला जाणाऱ्या तालुक्यातील इच्छुक भाविक, भजनी मंडळे आणि वारकऱ्यांनी आपल्या गावातील प्रवाशांची यादी तयार करून त्वरित यावल एसटी आगाराशी संपर्क साधावा, जेणेकरून वेळेवर बसचे नियोजन करणे सोपे होईल, असे आगार व्यवस्थापक दिलीप महाजन यांनी शेवटी नमूद केले.
आषाढी एकादशी निमित्त पंढरपूरला जाणाऱ्या वारकऱ्यांसाठी यावल एसटी आगाराने ‘गाव तिथे एसटी’ अंतर्गत विशेष बस सेवा सुरू केली असून, एका गावातून ४० प्रवासी उपलब्ध झाल्यास थेट गावापासून पंढरपूरसाठी स्वतंत्र बस दिली जाणार आहे.
