जळगाव-लाईव्ह ट्रेंड्स न्यूज प्रतिनिधी । जळगाव स्थानिक स्वराज्य संस्था मतदारसंघाच्या विधान परिषद निवडणुकीत मतदानाला उत्स्फूर्त प्रतिसाद मिळाला असून, सकाळी ८ ते दुपारी २ या दोन तासांच्या कालावधीत तब्बल 93.81 टक्के मतदानाची नोंद झाली आहे. जिल्ह्यातील सात मतदान केंद्रांवर झालेल्या मतदान प्रक्रियेत एकूण 630 मतदारांपैकी 591 मतदारांनी मतदानाचा हक्क बजावला.
जळगाव स्थानिक प्राधिकारी मतदारसंघाच्या निवडणुकीसाठी प्रशासनाने जिल्ह्यात विविध ठिकाणी मतदान केंद्रांची व्यवस्था केली होती. उपलब्ध आकडेवारीनुसार, एकूण 315 पुरुष आणि 315 महिला मतदार असे 630 मतदार मतदानासाठी पात्र होते. त्यापैकी 296 पुरुष आणि 295 महिला मतदारांनी मतदान केले असून, पुरुषांचे मतदान प्रमाण 93.97 टक्के तर महिलांचे मतदान प्रमाण 93.65 टक्के राहिले आहे.
मतदान केंद्रनिहाय आकडेवारीनुसार अमळनेर मतदान केंद्रावर एकूण 76 मतदारांपैकी सर्व 76 मतदारांनी मतदान केले असून येथे 100 टक्के मतदान झाले. फैजपूर येथे 101 पैकी 94 मतदारांनी मतदान केले असून मतदानाची टक्केवारी 93.07 टक्के इतकी राहिली.
भुसावळ मतदान केंद्रावर 118 मतदारांपैकी 103 मतदारांनी मतदान केले असून मतदानाची टक्केवारी 87.29 टक्के नोंदवण्यात आली. जळगाव शहरातील मतदान केंद्रावर 155 मतदारांपैकी 151 मतदारांनी मतदान केले असून येथे 97.42 टक्के मतदान झाले.
एरंडोल मतदान केंद्रावर 79 पैकी सर्व 79 मतदारांनी मतदान करत 100 टक्के मतदानाची नोंद केली. पाचोरा येथेही 60 पैकी 60 मतदारांनी मतदानाचा हक्क बजावला असून मतदानाची टक्केवारी 100 टक्के राहिली. तर चाळीसगाव येथे 41 मतदारांपैकी 28 मतदारांनी मतदान केले असून येथे 68.29 टक्के मतदान झाले.
विधान परिषद निवडणुकीसाठी झालेल्या या मतदान प्रक्रियेत कोणताही अनुचित प्रकार घडू नये यासाठी प्रशासनाकडून विशेष खबरदारी घेण्यात आली होती. जिल्हाधिकारी तथा निवडणूक निर्णय अधिकारी यांच्या मार्गदर्शनाखाली मतदान प्रक्रिया सुरळीत पार पडली.
जळगाव स्थानिक स्वराज्य संस्था मतदारसंघातील या निवडणुकीत उच्च मतदानाची नोंद झाल्याने निकालाबाबत राजकीय वर्तुळात उत्सुकता वाढली आहे. आता मतमोजणीकडे सर्वांचे लक्ष लागले असून, कोणाच्या बाजूने कौल मिळतो हे निकालानंतर स्पष्ट होणार आहे.
जळगाव विधान परिषद निवडणुकीत पहिल्या टप्प्यातच 93.81 टक्के मतदान झाल्याने राजकीय समीकरणांना वेग आला असून, अमळनेर, एरंडोल आणि पाचोरा येथे शंभर टक्के मतदानाची नोंद हा विशेष चर्चेचा विषय ठरला आहे.
