चोपडा-लाईव्ह ट्रेंड्स न्यूज प्रतिनिधी । चोपडा तालुक्यातील मौजे तांदलवाडी (निमगव्हाण वाळू घाट) येथील मंजूर वाळू घाटाच्या अटी व शर्तींचे उल्लंघन केल्याप्रकरणी तहसीलदार तथा तालुका दंडाधिकारी भाऊसाहेब थोरात यांनी मे. चामुंडा सप्लायर्स अँड कन्स्ट्रक्शनचे प्रतिनिधी प्रदीप युवराज गहाते यांना कारण दाखवा नोटीस बजावली आहे. या प्रकरणात तब्बल 4 कोटी 93 लाख 52 हजार 827 रुपयांची दंडात्मक रक्कम आकारण्याचा प्रस्ताव असून, 24 तासांत खुलासा सादर करण्याचे आदेश देण्यात आले आहेत.
जिल्हाधिकारी जळगाव यांच्या आदेशानुसार तांदलवाडी (निमगव्हाण) येथील तापी नदीपात्रातील वाळू घाटाचा लिलाव संबंधित ठेकेदारास मंजूर करण्यात आला होता. मात्र घाटावरील उत्खनन आणि वाहतूक करताना मंजुरीतील अटींचा भंग झाल्याच्या तक्रारी प्रशासनाकडे प्राप्त झाल्या होत्या. त्यानुसार तहसीलदार, उपविभागीय पोलीस अधिकारी, मंडळ अधिकारी आणि ग्राम महसूल अधिकारी यांच्या पथकाने 28 मे 2026 रोजी प्रत्यक्ष पाहणी केली.
पाहणीदरम्यान निमगव्हाण परिसरात दोन वेगवेगळ्या ठिकाणी मोठ्या प्रमाणावर वाळूचा साठा केल्याचे आढळून आले. अमळनेर-चोपडा मार्गालगत धुनीवाले मंदिराजवळ तसेच त्यापुढे सुमारे 200 मीटर अंतरावरील खासगी शेतजमिनीत एकूण 1,695 ब्रास (5,240.25 घनमीटर) वाळूचा साठा करण्यात आल्याचे पंचनाम्यात नमूद करण्यात आले आहे. हा साठा सक्षम प्राधिकाऱ्याची पूर्वपरवानगी न घेता करण्यात आल्याचा आरोप प्रशासनाने केला आहे.
या प्रकरणी मंडळ अधिकारी आणि ग्राम महसूल अधिकाऱ्यांनी सादर केलेल्या अहवालाच्या आधारे महाराष्ट्र जमीन महसूल अधिनियम 1966 च्या कलम 48 तसेच संबंधित गौण खनिज नियमांनुसार कारवाई प्रस्तावित करण्यात आली आहे. प्रशासनाने केलेल्या गणनेनुसार 1,851.68 ब्रास वाळूवर बाजारभावाच्या पाचपट दंड, रॉयल्टी आणि जिल्हा खनिज प्रतिष्ठान निधीची रक्कम धरून एकूण 4.93 कोटी रुपयांचा दंड आकारण्यात येऊ शकतो.
तहसीलदार भाऊसाहेब थोरात यांनी नोटीसमध्ये स्पष्ट केले आहे की, संबंधितांनी आवश्यक कागदपत्रे व पुराव्यांसह 24 तासांच्या आत लेखी खुलासा सादर करावा. अन्यथा कोणतेही म्हणणे नसल्याचे गृहीत धरून नियमानुसार दंड वसुलीची पुढील कार्यवाही करण्यात येईल.
