जळगाव-लाईव्ह ट्रेंड्स न्यूज प्रतिनिधी । शहरात पोलीस प्रशासन आणि विविध स्वयंसेवी संस्था (NGO) यांच्यात पहिल्यांदाच समन्वय बैठक आयोजित करण्यात आली. बैठक पोलीस अधीक्षक श्रीकांत धिवरे यांच्या अध्यक्षतेखाली पार पडली. याप्रसंगी समाजातील वाढत्या सामाजिक, सायबर आणि कायदा-सुव्यवस्थेच्या प्रश्नांवर प्रभावी तोडगा काढण्यासाठी पोलीस यंत्रणा आणि स्वयंसेवी संस्थांनी एकत्रितपणे काम करण्याची गरज अधोरेखित करण्यात आली. बैठकीत समाजातील विविध संवेदनशील विषयांवर संयुक्त उपक्रम राबविण्याचा निर्धार व्यक्त करण्यात आला.
बैठकीत पोलीस दलाचे ‘अधिकार’ आणि स्वयंसेवी संस्थांचा ‘सेवाभाव’ यांचा समन्वय हा काळाची गरज असल्याचे मत व्यक्त करण्यात आले. कायदा व सुव्यवस्था राखण्यासोबतच समाजामध्ये जाऊन जनजागृती, समुपदेशन, पुनर्वसन आणि सामाजिक प्रश्नांवर थेट काम करण्यासाठी एनजीओंची भूमिका महत्त्वपूर्ण ठरू शकते, असे सांगण्यात आले. पोलीस आणि समाज यांच्यात विश्वासाचा दुवा म्हणून स्वयंसेवी संस्था प्रभावीपणे काम करू शकतात, यावरही भर देण्यात आला.
महिला व बाल सुरक्षेच्या विषयावर चर्चा करताना कौटुंबिक हिंसाचार, महिलांवरील अत्याचार, पीडितांचे समुपदेशन आणि मानसिक आधार यासाठी संयुक्त प्रयत्न करण्याचे ठरविण्यात आले. बाल संरक्षण, बालहक्क आणि बालकांविरुद्ध होणाऱ्या गुन्ह्यांविषयी जनजागृती मोहिमा राबविण्याचाही निर्णय घेण्यात आला. तसेच रेल्वे स्टेशन, बसस्थानक परिसरातील बालकांसाठी विशेष मोहिमा आणि ‘ऑपरेशन मुस्कान’सारख्या उपक्रमांमध्ये एनजीओंचे सहकार्य घेण्यावर भर देण्यात आला.
अंमली पदार्थ व व्यसनमुक्तीच्या मुद्द्यावर शाळा आणि महाविद्यालयांमध्ये संयुक्त जनजागृती मोहिमा राबविणे, व्यसनमुक्ती केंद्रांच्या माध्यमातून पुनर्वसन करणे आणि तरुण पिढीला मुख्य प्रवाहात आणण्यासाठी विशेष उपक्रम हाती घेण्याचे ठरले. वाढत्या सायबर गुन्ह्यांच्या पार्श्वभूमीवर डिजिटल फसवणूक, ऑनलाइन ठगी आणि सायबर सुरक्षेबाबत ग्रामीण भागात तसेच ज्येष्ठ नागरिकांमध्ये जागरूकता निर्माण करण्यासाठी कार्यशाळा आयोजित करण्यावर एकमत झाले.
रस्ते सुरक्षेच्या दृष्टीने वाहतूक नियमांविषयी जनजागृती, संयुक्त रस्ते सुरक्षा मोहिमा आणि अपघातग्रस्तांना ‘गोल्डन अवर’मध्ये तातडीची मदत मिळावी यासाठी स्वयंसेवकांचे नेटवर्क तयार करण्याचा निर्णय घेण्यात आला. सण, यात्रा आणि मोठ्या कार्यक्रमांदरम्यान ट्रॅफिक व गर्दी नियंत्रणासाठी स्वयंसेवकांची मदत घेऊन पोलिसांवरील ताण कमी करण्याची संकल्पनाही मांडण्यात आली.
समुदाय पोलीसिंग अधिक प्रभावी करण्यासाठी शांतता समित्या आणि मोहल्ला समित्यांमध्ये एनजीओ प्रतिनिधींना स्थान देण्याबाबत सकारात्मक चर्चा झाली. ‘पोलीस मित्र’ या संकल्पनेअंतर्गत स्वयंसेवकांचा स्वतंत्र डेटाबेस तयार करून आपत्ती व्यवस्थापन, सामाजिक उपक्रम आणि विशेष मोहिमांमध्ये त्यांचा सहभाग वाढविण्याचा निर्णय घेण्यात आला.
घरगुती हिंसाचार, POCSO प्रकरणे आणि आत्महत्याग्रस्तांना मानसिक आधार देण्यासाठी तज्ज्ञ समुपदेशकांची मदत घेण्यावर भर देण्यात आला. तसेच गुन्हेगारी सोडून मुख्य प्रवाहात येणाऱ्या व्यक्तींचे पुनर्वसन, तुरुंगातून सुटलेल्या नागरिकांना रोजगाराच्या संधी उपलब्ध करून देणे आणि त्यांना समाजात पुन्हा स्थिर करण्यासाठी संयुक्त प्रयत्नांची गरज व्यक्त करण्यात आली.
कायद्याविषयी जनजागृती करण्यासाठी नागरिकांपर्यंत कायदेशीर माहिती पोहोचविणे, अफवा आणि गैरसमज रोखण्यासाठी मोहिमा राबविणे तसेच महिला व बाल गुन्ह्यांतील पीडितांना धीर देऊन पुरावे नोंदवण्यास मदत करण्याची भूमिकाही स्वयंसेवी संस्थांकडून पार पाडली जाईल, असे बैठकीत नमूद करण्यात आले.
