जळगाव-लाईव्ह ट्रेंड्स न्यूज प्रतिनिधी । जळगावातील नूतन मराठा महाविद्यालयाने विद्यार्थ्यांसाठी अंतराळ विज्ञान आणि संशोधन क्षेत्रात मोठी संधी उपलब्ध करून देत इस्रो स्टार्टअप ऑनलाइन प्रोग्रामला सुरुवात केली आहे. महाविद्यालयाला इस्रोकडून अधिकृत सेंटरचे प्रमाणपत्र प्राप्त झाल्याने विद्यार्थ्यांना आता थेट इस्रोच्या मार्गदर्शनाखाली विशेष प्रशिक्षण घेण्याची संधी मिळणार आहे. या उपक्रमामुळे महाविद्यालयाच्या शैक्षणिक गुणवत्तेत आणखी भर पडली असून विद्यार्थ्यांमध्ये उत्साहाचे वातावरण निर्माण झाले आहे.
महाविद्यालयात सीनियर कॉलेजच्या विद्यार्थी-विद्यार्थिनींसाठी सुरू करण्यात आलेल्या या कार्यक्रमांतर्गत ‘Scientific Observation from Space’ हा विशेष अभ्यासक्रम इस्रो डेहराडूनच्या माध्यमातून घेण्यात आला. ११ मार्च २०२६ ते एप्रिल २०२६ या कालावधीत पहिली बॅच यशस्वीरित्या पूर्ण झाली. या कार्यक्रमासाठी मोठ्या संख्येने विद्यार्थ्यांनी नोंदणी केली होती.
या प्रशिक्षणामध्ये विद्यार्थ्यांना अंतराळ निरीक्षण, उपग्रह तंत्रज्ञान, वैज्ञानिक विश्लेषण आणि अवकाश संशोधनाशी संबंधित विविध विषयांचे मार्गदर्शन करण्यात आले. प्रशिक्षण पूर्ण केल्यानंतर पंधरा विद्यार्थी-विद्यार्थिनींनी उत्कृष्ट कामगिरी करत ‘A ग्रेड’ प्राप्त केली असून त्यांना इस्रो डेहराडूनकडून अधिकृत प्रमाणपत्रही देण्यात आले आहे. या यशाबद्दल विद्यार्थ्यांचे सर्वत्र कौतुक होत आहे.
महाविद्यालय प्रशासनाने भविष्यातही अशा प्रकारचे नवनवीन अभ्यासक्रम सुरू ठेवण्याचा निर्णय घेतला असून पात्र विद्यार्थ्यांना या कार्यक्रमांमध्ये सहभागी होण्याची संधी दिली जाणार आहे. विद्यार्थ्यांना आधुनिक विज्ञान आणि संशोधन क्षेत्राशी जोडण्यासाठी हा उपक्रम महत्त्वपूर्ण ठरणार असल्याचे मत व्यक्त केले जात आहे.
या सेंटरसाठी विशेष प्रयत्न महाविद्यालयाचे प्राचार्य डॉ. एल. पी. देशमुख, उपप्राचार्य डॉ. के. बी. पाटील, डॉ. माधुरी पाटील तसेच भौतिकशास्त्र विभाग प्रमुख आर. बी. देशमुख यांनी केले. त्यांच्या पुढाकारामुळे विद्यार्थ्यांना इस्रोसारख्या प्रतिष्ठित संस्थेच्या कार्यक्रमाचा लाभ मिळू शकला आहे.
