जळगाव-लाईव्ह ट्रेंड्स न्यूज प्रतिनिधी । जळगाव येथील गोदावरी फाऊंडेशन संचलित गोदावरी अभियांत्रिकी महाविद्यालयाच्या विद्यार्थ्यांनी राष्ट्रीय स्तरावरील इनोव्हेशन डिझाईन अँड इंटरप्रिनरशिप (आयडीई) बूटकॅम्प एडिशन ३ मध्ये उल्लेखनीय सहभाग नोंदवत महाविद्यालयाचा गौरव वाढवला आहे. या सहभागामुळे विद्यार्थ्यांच्या नवोपक्रम क्षमतेला चालना मिळाली असून उद्योजकतेकडे वाटचाल करण्यासाठी त्यांना नवी प्रेरणा मिळाली आहे.
ऑल इंडिया कौन्सिल फॉर टेक्निकल एज्युकेशन आणि मिनिस्ट्री ऑफ एज्युकेशन इनोव्हेशन सेल यांच्या संयुक्त विद्यमाने ६ ते १० एप्रिल २०२६ दरम्यान सोलापूर येथील एन. बी. नवले अभियांत्रिकी महाविद्यालयात हा पाच दिवसीय बूटकॅम्प आयोजित करण्यात आला होता. देशभरातील निवडक विद्यार्थ्यांना या उपक्रमात सहभागी होण्याची संधी देण्यात आली होती. नवोपक्रम, डिझाईन थिंकिंग आणि उद्योजकता याबाबत विद्यार्थ्यांमध्ये जागरूकता निर्माण करणे हा या उपक्रमाचा मुख्य उद्देश होता.
गोदावरी अभियांत्रिकी महाविद्यालयाच्या कृत्रिम बुद्धिमत्ता व डेटा सायन्स विभागातील तृतीय वर्षातील विद्यार्थी यश अनिल चौधरी यांनी मयूर गुरव आणि दीपक काळे यांच्या टीमसह या बूटकॅम्पमध्ये सक्रिय सहभाग घेतला. या विद्यार्थ्यांना प्रा. देवपाल यादव यांचे मार्गदर्शन लाभले. त्यांच्या सहभागामुळे महाविद्यालयाच्या शैक्षणिक गुणवत्तेची झलक राष्ट्रीय स्तरावर दिसून आली.
या बूटकॅम्पमध्ये विद्यार्थ्यांना आयडिया व्हॅलिडेशन, प्रोटोटाइप डेव्हलपमेंट, बिझनेस मॉडेल कॅनव्हास आणि प्रभावी पिचिंग स्किल्स याबाबत तज्ज्ञांकडून सखोल प्रशिक्षण देण्यात आले. तसेच उद्योग क्षेत्रातील अनुभवी तज्ज्ञांशी संवाद साधण्याची संधी मिळाल्यामुळे विद्यार्थ्यांचा आत्मविश्वास अधिक दृढ झाला. प्रत्यक्ष अनुभवावर आधारित या प्रशिक्षणामुळे विद्यार्थ्यांना स्टार्टअप आणि नवोपक्रम क्षेत्रातील संधींबाबत सखोल माहिती मिळाली.
या सहभागामुळे विद्यार्थ्यांनी केवळ तांत्रिक ज्ञानातच नव्हे, तर उद्योजकतेच्या दिशेनेही महत्त्वाचे पाऊल टाकले आहे. महाविद्यालयात नवोपक्रम व स्टार्टअप संस्कृतीला चालना मिळण्यास हा उपक्रम निश्चितच उपयुक्त ठरणार असल्याचे मत व्यक्त करण्यात आले.
विद्यार्थ्यांच्या या यशस्वी सहभागाबद्दल महाविद्यालयाचे प्राचार्य डॉ. विजयकुमार पाटील (आयआयसी अध्यक्ष), डॉ. हेमंत इंगळे (उपाध्यक्ष), डॉ. अतुल बर्हाटे (समन्वयक) तसेच शैक्षणिक अधिष्ठाता डॉ. तुषार कोळी यांचे मार्गदर्शन लाभले. विभागप्रमुख डॉ. अनिलकुमार विश्वकर्मा व इतर प्राध्यापकांनीही विद्यार्थ्यांचे कौतुक केले.
गोदावरी फाऊंडेशनचे अध्यक्ष डॉ. उल्हास पाटील, सचिव डॉ. वर्षा पाटील, सदस्य डॉ. केतकी पाटील, डॉ. वैभव पाटील आणि डॉ. अनिकेत पाटील यांनी विद्यार्थ्यांचे अभिनंदन करून त्यांच्या पुढील वाटचालीस शुभेच्छा दिल्या.
