जळगाव-लाईव्ह ट्रेंड्स न्यूज प्रतिनिधी । जळगावातील डॉ. उल्हास पाटील वैद्यकीय महाविद्यालयाच्या अन्नपुर्णालयम येथे रामनवमी निमित्त रामजन्मोत्सव अत्यंत भक्तीभाव आणि उत्साहात साजरा करण्यात आला. धार्मिक विधी, मंत्रपठण आणि भजनसंध्येच्या कार्यक्रमांनी संपूर्ण परिसर राममय झाला होता.
या प्रसंगी प्रख्यात हृदयरोग तज्ज्ञ डॉ. वैभव पाटील यांच्या हस्ते प्रभू श्रीरामचंद्रांची विधिवत पूजा करण्यात आली. राजपुरोहित डी. टी. राव यांनी मंत्रोच्चार करत धार्मिक विधी पार पाडले. त्यांच्या मंत्रपठणामुळे कार्यक्रमाला पारंपरिक आणि आध्यात्मिक रंग प्राप्त झाला.
पूजनानंतर श्रीरामाची महाआरती करण्यात आली आणि उपस्थित भाविकांना महाप्रसादाचे वाटप करण्यात आले. दिवसभर अन्नपुर्णालयम येथे प्रभू श्रीरामचंद्रांचे दर्शन घेण्यासाठी भाविकांनी मोठी गर्दी केली होती, ज्यामुळे संपूर्ण वातावरण भक्तीमय झाले होते.
या कार्यक्रमाला गोदावरी फाउंडेशनचे अध्यक्ष माजी खासदार डॉ. उल्हास पाटील, सचिव डॉ. वर्षा पाटील, वैद्यकीय महाविद्यालयाचे संचालक डॉ. एन. एस. आर्विकर, डॉ. माया आर्विकर, डॉ. विजय बाविस्कर, पियुष भंगाळे यांच्यासह अन्नपुर्णालयमचे कर्मचारी उपस्थित होते. सर्व मान्यवरांनी रामजन्मोत्सवाच्या निमित्ताने सामाजिक एकात्मता आणि संस्कार जपण्याचे महत्त्व अधोरेखित केले.
यावेळी गीत रामायणावर आधारित भजनसंध्येचे आयोजन करण्यात आले होते. सुरेल भजनांनी उपस्थितांना भावविभोर केले आणि आध्यात्मिक समाधानाचा अनुभव दिला. या कार्यक्रमामुळे वैद्यकीय महाविद्यालय परिसरात धार्मिक आणि सांस्कृतिक वातावरण निर्माण झाले होते.
