जळगाव-लाईव्ह ट्रेंड्स न्यूज प्रतिनिधी । जिल्ह्यातील प्रशासकीय कामकाज अधिक पारदर्शक व भ्रष्टाचारमुक्त करण्याच्या उद्देशाने जिल्हास्तरीय भ्रष्टाचार निर्मूलन समितीची महत्त्वपूर्ण आढावा बैठक जिल्हाधिकारी रोहन घुगे यांच्या अध्यक्षतेखाली पार पडली असून तक्रारींच्या निपटाऱ्यासंदर्भात प्रशासनाने ठोस भूमिका घेतली आहे.
दि. २५ मार्च रोजी झालेल्या या बैठकीत समितीकडे प्राप्त झालेल्या विविध तक्रारींचा सविस्तर आढावा घेण्यात आला. प्रलंबित प्रकरणांची सद्यस्थिती, त्यावर करण्यात आलेली कार्यवाही तसेच पुढील उपाययोजनांबाबत संबंधित विभागांना स्पष्ट निर्देश देण्यात आले. तक्रारींची वस्तुनिष्ठ व गुणवत्तापूर्ण चौकशी करून निर्धारित मुदतीत अहवाल सादर करण्यावर भर देण्यात आला.
भ्रष्टाचाराशी संबंधित प्रकरणांमध्ये नियमबद्ध आणि कठोर कारवाई करण्याचे निर्देश देताना जिल्हाधिकारी रोहन घुगे यांनी प्रत्येक तक्रारीचा गांभीर्याने विचार करून त्यांचा वेळेत निपटारा करण्याचे आदेश दिले. नागरिकांच्या तक्रारींकडे दुर्लक्ष न करता तत्परतेने कार्यवाही करण्याची जबाबदारी संबंधित विभागांवर असल्याचे त्यांनी अधोरेखित केले.
बैठकीत प्रशासनाच्या कार्यपद्धतीत पारदर्शकता वाढवण्यावर विशेष भर देण्यात आला. नागरिकांना वेळेवर व गुणवत्तापूर्ण सेवा देणे, तसेच भ्रष्टाचाराला आळा घालण्यासाठी प्रभावी उपाययोजना राबवणे हे प्रशासनाचे मुख्य उद्दिष्ट असल्याचेही यावेळी नमूद करण्यात आले.
जिल्हा प्रशासनाकडून सातत्याने प्रयत्न करून नागरिकांना भ्रष्टाचारमुक्त, लोकाभिमुख आणि पारदर्शक सेवा उपलब्ध करून देण्याचा संकल्प व्यक्त करण्यात आला. या बैठकीमुळे प्रशासन अधिक जबाबदार आणि कार्यक्षम होण्यास मदत होणार असल्याची अपेक्षा व्यक्त केली जात आहे.
