मुंबई-वृत्तसेवा । टी20 वर्ल्डकप 2026 स्पर्धेतील उपांत्य फेरीत भारत आणि इंग्लंड आमनेसामने येत असून या महामुकाबल्यापूर्वीच शाब्दिक चकमक रंगली आहे. 5 मार्च रोजी मुंबईतील वानखेडे स्टेडियम येथे होणाऱ्या या लढतीकडे क्रिकेटविश्वाचे लक्ष लागले आहे. सामन्यापूर्वी इंग्लंडचा अष्टपैलू खेळाडू सॅम करन याने भारताचा सलामीवीर अभिषेक शर्मा याच्याबाबत भीती व्यक्त करत आपल्या मनातील भावना मोकळ्या केल्या आहेत.
टी20 वर्ल्डकप 2026 स्पर्धा आता अंतिम टप्प्यात पोहोचली असून उपांत्य फेरीतील विजय अंतिम फेरीचे तिकीट निश्चित करणार आहे. अशा निर्णायक क्षणी करनने अभिषेक शर्माच्या आक्रमक फलंदाजीबाबत सावधगिरीचा इशारा दिला आहे. “अभिषेक शर्मा एकदा लयीत आला तर त्याला रोखणं कठीण आहे. आम्हाला त्याच्या धोक्याची पूर्ण जाणीव आहे. आशा आहे की तो पुन्हा आक्रमक खेळी करणार नाही,” असे वक्तव्य करनने केले. विशेष म्हणजे, या स्पर्धेत अभिषेकची कामगिरी निराशाजनक राहिली असली तरी त्याच्या भूतकाळातील धडाकेबाज खेळीमुळे इंग्लंडच्या खेळाडूंमध्ये धास्ती आहे.
इंग्लंडला अभिषेकची भीती का वाटते यामागे वानखेडेवरील एक संस्मरणीय सामना कारणीभूत आहे. याच मैदानावर झालेल्या मागील टी20 सामन्यात अभिषेक शर्माने 54 चेंडूत 135 धावांची वादळी खेळी करत इंग्लंडच्या गोलंदाजांची अक्षरशः धुलाई केली होती. त्याने 13 षटकार आणि 7 चौकार ठोकत भारताला तब्बल 150 धावांनी विजय मिळवून दिला होता. टी20 इतिहासातील इंग्लंडचा तो सर्वात मोठा पराभव मानला जातो. त्यामुळे वानखेडेवर पुन्हा एकदा अभिषेक तुफान खेळी करेल का, याची चिंता इंग्लंडला सतावत आहे.
यंदाच्या टी20 वर्ल्डकपमध्ये मात्र अभिषेकची कामगिरी फारशी चमकदार राहिलेली नाही. पहिल्या सामन्यात अमेरिकेविरुद्ध तो खातेही उघडू शकला नाही. त्यानंतर सलग तीन वेळा शून्यावर बाद होण्याचा नकोसा विक्रम त्याच्या नावावर जमा झाला. झिम्बाब्वेविरुद्ध त्याने 55 धावांची खेळी साकारली, तर दक्षिण आफ्रिका आणि वेस्ट इंडिजविरुद्ध अनुक्रमे 15 आणि 10 धावा केल्या. स्पर्धेत एकूण 80 धावा असूनही त्याची स्फोटक शैली कोणत्याही क्षणी सामन्याचा चेहरा बदलू शकते, हे इंग्लंडला ठाऊक आहे.
सॅम करनने स्पष्ट केले की इंग्लंड संघ पूर्ण तयारीनिशी मैदानात उतरणार आहे आणि गुरुवारी होणाऱ्या सामन्यावर त्यांचे संपूर्ण लक्ष असेल. भारत-इंग्लंड ही पारंपरिक प्रतिस्पर्धी जोडी असल्याने हा सामना रंगतदार होणार, यात शंका नाही.
